QR Aýyl sharýashylyǵy mınıstri maqtashylarmen kezdesti
Mınıstrmen birge oblys ákimi Ómirzaq Shókeev erip júrdi.
Eń aldymen olar Maqtaaral aýyldyq okrýgi, «Aq altyn» eldi mekenindegi «AShM servıs-ortalyǵy» óndiristik kooperatıviniń maqta terimi naýqanymen tanysty. Onda bıylǵy jyly 70 ga jerge M-4011 maqta sorttyq tuqymyn egip, 25,0 ts/ga túsimdilikpen ónim alýda. Búgingi tańda 43 adamdy jumyspen qamtyp otyrǵan óndiristik kooperatıvi 58 birlik aýyl sharýashylyǵy tehnıkalarymen jabdyqtalǵan.
Jalpy bıylǵy jyly oblysta 131 myń ga maqta egelip, 340 myń tonnadan astam ónim jınaý josparlanýda. Onyń 320 myń tonnasy jınaldy.
Maqta sharýashylyǵyndaǵy negizgi másele – «aq altynnyń» baǵasy. Búgingi tańda Maqtaaral aýdanyndaǵy zaýyttar maqtanyń tonnasyna 100 myń teńgeden avans berip jatyr. Alaıda áli kúnge deıin naqty baǵa bekitpegen. Mınıstr men oblys ákimi dál osy máseleni sheshý úshin Atakent kentindegi «Qazaq maqta sharýashylyǵy ǵylymı-zertteý ınstıtýty» JShS-inde aýdannyń maqta óńdeý zaýyttarynyń basshylary men aýyl sharýashylyǵy taýaryn óndirýshilermen kezdesý jıynyn ótkizdi.
Jıyn barysynda oblys ekonomıkasynyń eń mańyzdy salasynyń biri – maqta sharýashylyǵynyń ózekti máseleleri talqylanyp, oblys ákimdigi tarapynan Qazaqstan Respýblıkasy Aýyl sharýashylyǵy mınıstrine tıisti usynystar engizildi.
Bul rette, Saparhan Omarov aıtylǵan usynystardy qoldaıtyndyǵyn, aldaǵy ýaqytta Úkimet deńgeıinde kóterip, oń sheshimi tabylatyndyǵyn aıtty. Óz kezeginde, Ómirzaq Shókeev shıtti maqta baǵasy aldaǵy kúnde turaqtaıtyndyǵy, sharýalardyń suranystary boıynsha tıimdi baǵa bekitiletinin jetkizdi.
Al, zaýyt basshylary maqta baǵasyn bekitý úshin 3 kún merzim surady.
Sapar sońynda mınıstr Saıram aýdanynda ornalasqan «Dala-fruit.kz» JShS-ne ıntensıvti alma baýyna jáne «Nurym Grýpp» JShS 10 myń basqa arnalǵan mal bordaqylaý alańynyń jumystarymen tanysty.
Sondaı-aq, oblysta aýyl sharýashylyǵy salasynda atqarylyp jatqan jumystarǵa oń baǵasyn berdi.
