QR Aýyl sharýashylyǵy mınıstri AÓK-ti damytýdyń negizgi qaǵıdalaryn aıtty

ASTANA. QazAqparat - Qazaqstan Respýblıkasy Prezıdentiniń Halyqpen eseptik kezdesý ótkizý týraly 2016 jylǵy 5 aqpandaǵy №190 Jarlyǵyn júzege asyrý maqsatynda QR Premer-Mınıstriniń orynbasary - QR Aýyl sharýashylyǵy mınıstri A. Myrzahmetovtiń 2015 jyldyń qorytyndylary boıynsha Qazaqstan Respýblıkasy AÓK damytý jónindegi Qoǵamdyq keńes aldynda eseptik kezdesýi ótti, dep habarlady vedomstvo baspasóz qyzmeti.

Esepti tyńdaýǵa QR AShM  ókilderi, Qazaqstan Respýblıkasy Parlament depýtattary, «Atameken» UKP, úkimettik emes uıymdar jáne bıznes ókilderi qatysty.

Qazaqstan Respýblıkasynyń Aýyl sharýashylyǵy mınıstri A. Myrzahmetov óz baıandamasynda 2015 jylǵy agroónerkásiptik keshendi damytý nátıjeleri men aǵymdaǵy jylǵa arnalǵan vedomstvonyń negizgi tapsyrmalary týraly sóz qozǵady.

2015 jyly aýyl sharýashylyǵy óniminiń jalpy kólemi 3,4 paıyzǵa ulǵaıyp,  3,3 trln. teńgeni quraǵany erekshe atalyp ótti.

Azyq-túlik ónerkásibiniń negizgi kapıtalyndaǵy ınvestıtsııa kólemi 28 paıyzǵa ulǵaıyp, 55,9 mlrd.teńgeni qurady.

Respýblıkanyń aýyl sharýashylyǵy taýarlaryn óndirýshiler úshin qolaıly jaǵdaı jasaýǵa baǵyttalǵan birqatar zańnamalyq aktiler qabyldandy. Sonyń ishinde, shaǵyn aýyl sharýashylyǵy ónimderin óndirýshilerdiń birigýine, kedergilerdi boldyrmaý úshin «Aýyl sharýashylyǵy kooperatıvteri týraly» jańa zań qabyldandy. Sondaı-aq, «Organıkalyq ónim óndirý týraly»  zań qabyldandy.

2015 jylǵy aýa raıynyń qolaısyz jaǵdaıyna qaramastan 18,7 mln.tonna astyq jınaldy, ol 2014 jylǵy deńgeıden 1,5 mln.tonnaǵa artyq.

Ósimdik sharýashylyǵyn ártaraptandyrý boıynsha belgili jumystar jasaldy, mal sharýashylyǵy salasynyń ónimindiligin arttyrý jáne genofondy jaqsartý birtindep jolǵa qoıylyp keledi. Nátıjesinde, 2015 jyly 16 myń tonnadan astam et jáne et ónimderi, onyń ishinde 6,4 myń tonna muzdatylǵan sıyr eti eksporttaldy.

Azyq-túlik óniminiń kólemi 2014 jylmen calystyrǵanda 0,1 paıyzǵa joǵary.

Bul nátıjeler «Agrobıznes - 2020» baǵdarlamasynda qarastyrylǵan AÓK memlekettik qoldaý sharalaryn iske asyrý arqasynda qamtamasyz etildi. 

«Aldaǵy kezeńde aýyl sharýashylyǵynyń negizgi baǵyty aýyl sharýashylyǵy ónimderin tıimdi óndirýdi qamtamasyz etý, qoldanystaǵy qaıta óńdeý kásiporyndarynyń qýatyn arttyrý, azyq-túlik qaýipsizdigin qamtamasyz etip, ımportty almastyrý úshin ishki rezervti barynsha paıdalaný qajet» - dep atap ótti vedomstvo basshysy óz sózinde.  

QR AÓK damytý boıynsha Qoǵamdyq keńes músheleri Mınıstrdiń baıandamasyn tyńdap jáne talqylap vedomstvanyń jumysyna qanaǵattanarlyq degen baǵa berdi. Sonymen qatar, Qoǵamdyq keńestiń tóraǵasy M. Troshıhın AÓK memlekettik qoldaýdyń is-sharalaryn jaqsartý boıynsha usynysyn bildirdi.

Tyńdaýdyń qorytyndylary boıynsha AÓK negizgi baǵyttaryn damytý jónindegi usynymdar berilgen rezolıýtsııa qabyldandy.