QR Aýmaqtyq damý josparynda qandaı taqyryptar qamtylady

NUR-SULTAN. QazAqparat – Qazaqstanda 1 shildege deıin Aýmaqtyq damý josparyn ázirleý josparlanǵan. Bul qujatta qandaı taqyryptar qamtylatynyn QR Strategııalyq josparlaý jáne reformalaý agenttiginiń tóraǵasy Qaırat Kelimbetov aıtyp berdi, dep habarlaıdy QazAqparat tilshisi.

«Biz ár óńirdegi ahýaldyń qandaı ekenin, onda áleýmettik kórsetkishterge qalaı qol jetkiziletinin, ornyqty damý maqsattarynyń qalaı oryndalatynyn, keı óńirlerdiń ekologııalyq jaı-kúıin aıqyn túsinýge tıispiz. Ekinshi jaǵynan, ár aımaqtyń ózindik básekelik artyqshylyǵy bar. ShQO, Qaraǵandy, Pavlodar sııaqty óńirler iri óndiristerdi tehnologııalyq jańǵyrtýǵa daıyn. Al keıbir aımaqtar agroóńdeýge, aýyl sharýashylyǵyn damytýǵa baǵdarlanǵan. Munaı óńdeýdi damytý – Qazaqstannyń batys aımaqtarynda jaqsy. Endi bir qyrynan bizde aýmaqtyq damý saıasaty boıynsha aglomeratsııa qalyptasyp jatyr. Eń aldymen, Almaty, Nur-Sultan, Shymkent aınalasynda tıisti damý bolýy tıis», - dedi Qaırat Kelimbetov Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, qujatty 1 shildege deıin ázirleý josparlanǵan.

«Bıýdjet saıasaty, salyq, áleýmettik, ınfraqurylymdyq saıasat qalaı qurylady – munyń bári óńirler bólinisinde aýmaqtyq damý josparynda kórinis tabady. Biz ony Ulttyq ekonomıka mınıstrligimen birlesip ázirleımiz. 1 shildege deıin joba reformalar jónindegi Joǵary keńestiń otyrysynda qaralady dep oılaımyz», - dedi Q. Kelimbetov.