QR áýejaılarynda qyzmet kórsetý ýaqyty 60 mınýttan aspaýy tıis
ASTANA. 23 qańtar. QazAqparat - Budan bylaı elimizdiń áýejaılary men áýe kompanııalary jolaýshylarǵa qyzmet kórsetý mindetin jańa Erejege sáıkes atqaratyn bolady.
Bul týraly Astana halyqaralyq áýejaıynyń baspasóz qyzmeti habarlap otyr.
Qazaqstan Respýblıkasy Úkimeti 2013 jyly bekitken Ereje ushyp kelgen jáne ushyp shyǵatyn, sondaı-aq, transferlik jáne tranzıttik jolaýshylarǵa qyzmet kórsetý tártibin retteıdi. Jańa Erejede múmkindigi shekteýli jolaýshylardy tirkeý erekshelikteri, olardy tasymaldaý jáne rásimdeý tártibi de qarastyrylǵan.
«Budan ózge, jańa Erejege sáıkes jolaýshylarǵa qyzmet kórsetýdiń halyqaralyq sapa standarttaryn engizý kózdelgen. Negizgi krıterııler qatarynda - reısterdiń ózara ushtasýynyń yńǵaılylyǵy, kútý aımaǵyn jabdyqtaý, jolaýshylardyń áýejaılarda ońaı baǵdarlanýy úshin jaǵdaı jasaý. Bularǵa qosa, standarttar áýejaılardaǵy qoǵamdyq tamaqtaný mekemeleri, jolaýshylardy aqparattandyrý qyzmeti, jolaýshylardyń áýejaıdyń barlyq rejımdik aımaǵynda uıaly baılanys pen symsyz Internetke qoljetimdiligin qamtamasyz etýin qamtıdy», - delingen habarlamada.
Sondaı-aq, tekserýden ótý kezinde jolaýshylarǵa jaıly jaǵdaı jasaýǵa baǵyttalǵan normalar da qarastyrylǵan. Qabyldanǵan standarttar boıynsha jolaýshyny tekserý ýaqyty kezekte turýyn qosa eseptegende 7 mınýttan aspaýy tıis.
Áýejaılardaǵy kútý aımaǵyn jabdyqtaý barysynda adam shoǵyrlanatyn arnaıy oryn bolmaǵan jaǵdaıda jolaýshylar men shyǵaryp salýshylar úshin otyratyn oryndar 20 %-dan kem bolmaýy tıis. Al, eger adam shoǵyrlanatyn arnaıy oryn bolsa, onda jınalatyn jolaýshylardyń 60%-y otyrý múmkindigine ıe bolýy qajet.
Reıster kestege sáıkes oryndalyp jatqan jaǵdaıda jolaýshylardyń tólqujat jáne vıza baqylaýlarynan ótý ýaqyty ushyp kelgende 20 mınýttan, ushyp bara jatqanda, kezekke ketken ýaqytty qosa eseptegende, 30 mınýttan aspaýy tıis. Jolaýshylar ushyp kelgende áýejaıda olarǵa qyzmet kórsetý ýaqyty 45 mınýttan, ushyp bara jatqanda - 60 mınýttan aspaýy kerek. Ereje boıynsha avtoturaqtarǵa da arnaıy talaptar qoıylatyn bolady. Jolaýshy aınalymy jylyna 1 mıllıon adamdy quraıtyn áýejaıda kólik turaqtary 500 orynnan kem bolmaýy kerek. Jolaýshynyń aerovokzaldan avtoturaqqa deıin ketetin ýaqyty 5 mınýttan aspaýy tıis.
Osy jáne ózge de sharalar jolaýshylarǵa qaýipsiz jáne sapaly qyzmet kórsetýge, azamattardyń áýejaılar men áýe kompanııalarynyń qyzmetterine kóńilderi tolý deńgeıin arttyrýǵa baǵyttalǵan.
Erejege sáıkes, ár áýejaıda jolaýshylar termınalynyń ótkizý múmkindigine qaraı jolaýshylarǵa qyzmet kórsetý boıynsha ishki nusqaýlyqtar ázirlenetin bolady.
Áýejaılardy qyzmet kórsetý sapasynyń standarty Qazaqstan Respýblıkasy Premer-Mınıstriniń 2012 jylǵy shildede azamattyq avıatsııa salasyn memlekettik retteý máseleleri jóninde ótkizgen keńesindegi tapsyrmalardy oryndaý aıasynda ázirlengenin eske salamyz.
Jańa Ereje resmı jarııalanǵannan bastap 10 kúntizbelik kún ishinde kúshine enedi.
