QR Áskerı medıtsınalyq ortalyǵynda mamandardy daıarlaýdyń halyqaralyq tájirıbesi engiziledi

ASTANA. QazAqparat - Qazaqstan Qorǵanys mınıstrliginiń Áskerı medıtsınalyq ortalyǵy úzdik halyqaralyq tájirıbege sáıkes mamandardyń áskerı-medıtsınalyq daıarlyǵyn damytý, jańa oqý baǵdarlamalaryn engizý jáne óńirlik deńgeıge shyǵý sııaqty keleshegi zor baǵyttardy ıgerýde.

Bul týraly QR Qorǵanys mınıstrliginiń baspasóz qyzmetinen habarlady.

Atalǵan ortalyqta dóńgelek ústelderden bastap trenıngter men oqytý kýrstaryna deıingi ár túrli pishimdegi tutas keshendi is-sharalar turaqty túrde ótkiziledi. Tájirıbe almasý, jańa jobalar jasaý úshin Qazaqstannyń túkpir-túkpiri men shet memleketterden áskerı medıtsına salasyndaǵy mamandar shaqyrtylady. Onyń ishinde, aǵymdaǵy jyly Almaty óńirlik garnızonynyń áskerı bólimderi men mekemeleriniń hırýrgııa salasyndaǵy medıtsınalyq mamandarǵa arnalǵan kýrstar uıymdastyrylǵan bolatyn. Oqytýdy Shvetsııanyń halyqaralyq dárejedegi bapkerler, jetekshi hırýrg mamandary ótkizdi. Atalmysh kýrsta jaralylardy suryptaý qaǵıdattary jeke taqyryp retinde zerdelengenin aıta ketken abzal. Bul áskerı medıtsına mamandary úshin asa mańyzdy taqyryp bolyp tabylady. Sebebi, qarýly qaqtyǵystar jaǵdaıynda jaralylardyń kóp bolýy kezinde medıtsınalyq kómek kórsetý kezegin belgileý qabyldaýǵa májbúr eń kúrdeli sheshim bolyp keledi. Qazaqstan Qarýly Kúshteri delegatsııasynyń Tokıo (Japonııa) qalasynda oqý oryndar men áskerı-medıtsınalyq mekemelerdi aralaý kezinde QR QM Áskerı medıtsınalyq ortalyǵy medıtsına kadrlaryn daıarlaý jáne jańa oqý baǵdarlamalaryn engizý máselelerin kótergen bolatyn. Bul jerde qazaqstandyqtar áskerı-medıtsınalyq mamandardy oqytý, sonymen qatar, utqyr dalalyq gospıtalderdi paıdalaný ádistemesin zerdeledi.