QR Áskerı áýe kúshteri jańa tikushaqtarmen tolyqty
Saltanatty sharaǵa Áskerı-áýe kúshteriniń qolbasshylyǵy men Qazaqstan Respýblıkasy Qarýly Kúshteri ÁÁK-niń ardagerleri qatysty.
«Búgin bólim tarıhyndaǵy ataýly kún. Qazaqstan Respýblıkasy Táýelsizdiginiń 25 jyldyǵynda biz sý jańa tikushaqtardy alǵanymyzǵa qýanyshtymyz jáne maqtanysh sezimdemiz. Avıatsııalyq bazanyń barlyq jeke quramy atynan ushý jáne ınjenerlik-tehnıkalyq quram jańa avıatsııalyq tehnıkany saýatty ári qunttap paıdalanady dep senimmen aıta alamyn», - dedi avıatsııalyq bazanyń komandıri polkovnık Maral Kárimov.
Tikushaqtar budan buryn qazaqstandyq tarap pen «Reseı tikushaqtary» holdıngi arasynda jasalǵan kelisimshartqa sáıkes keldi. Budan buryn avıabazanyń ushý jáne ınjenerlik-tehnıkalyq quramy óndirýshi zaýytta ushýdyń qaıta daıyndyǵynan ótken bolatyn.
Mı-171Sh Mı-8 úlgisindegi tikushaqtardyń sońǵy modıfıkatsııalarynyń birinen quralǵan. Tikushaqtyń joǵary ushý tehnıkalyq sıpattamalary jáne qaýipsizdik deńgeıi bar. Zamanaýı qondyrǵymen jáne jańa úlgidegi júıelermen jabdyqtalǵan. Paıdalanýda jáne qyzmet kórsetýde qarapaıym, Tselsııa boıynsha -50-den +50 gradýsqa deıingi temperatýra men jaǵdaıdyń keń dıapazonynda qoldaný múmkindigine, beriktilikke jáne kóp fýnktsıonaldylyqqa ıe.
Desanttyq-kóliktik tapsyrmalardy oryndaýdan basqa tikushaqtyń atalmysh úlgisi qurlyqtaǵy bólimshelerdi ustap turý, ıaǵnı, qarsylastyń jandy kúshin, brondy tehnıkany, bekitilgen atys núkteleri men ózge de jyljymaly jáne jyljymaıtyn nysanalardy joıý, desantty atyspen qoldaý, áskerı lekterdi alyp júrý, patrýldeý, izdestirý-qutqarý operatsııalaryn júrgizý úshin arnalǵan. Bul tikushaqtardyń ekinshi partııasy ekenin aıta ketken jón. Mı-171Sh tikushaǵynyń alǵashqy býyny Qazaqstan Áskerı-áýe kúshteriniń jaraqtandyrylýyna 2015 jyldyń jeltoqsan aıynda kelip túsken bolatyn.
