QR AShM vıtse-mınıstri Ósimdikter karantıni salasyndaǵy memorandýmǵa qol qoıdy

NUR-SULTAN. QazAqparat - Memleket basshysynyń eksporttyq áleýetti arttyrý jónindegi tapsyrmasyn oryndaý maqsatynda QR Aýyl sharýashylyǵy vıtse-mınıstri Gúlmıra Isaeva Qytaı Halyq Respýblıkasy Bas keden basqarmasy mınıstriniń orynbasary Van Lın Tszıýnmen kezdesý ótkizdi.

Bul týraly QR Úkimetiniń baspasóz qyzmeti habarlady.

Kezdesý barysynda qazaqstandyq taýarlardyń QHR naryǵyna qoljetimdiligin keńeıtý máseleleri talqylandy, sondaı-aq qazaqstandyq ónimderdi eksporttaý úshin mańyzdy qujattarǵa qol qoıyldy. Bul - ósimdikter karantıni salasyndaǵy memorandým jáne QR-dan QHR-ǵa shoshqa etin eksporttaýǵa qoıylatyn talaptar jónindegi hattama.

Eki el arasyndaǵy saýdany damytý, sondaı-aq, Jol kartasynyń is-sharalaryn júzege asyrý maqsatynda 2018 jyldyń qarasha aıynda Shanhaı qalasynda QR AShM men QHR GTÝ vedomstvolary arasynda qol qoıylǵan qazaqstandyq ónimdi Qytaıǵa eksporttaýǵa qoıylatyn talaptardy kelisý boıynsha jumystar júrgizilýde. Jol kartasynyń 14 pýnktinen 6 pýnkt oryndaldy. Barlyǵy 18 hattamaǵa qol qoıyldy, bul eki el arasyndaǵy taýar aınalymyn arttyrýǵa múmkindik beredi.

Osy jyldyń 7 aıynda eki el arasyndaǵy AÓK ónimderiniń taýar aınalymy 24,5%-ǵa ósip, $297 mln qurady. Sonymen qatar, QHR-ǵa qazaqstandyq AÓK óniminiń eksporty aqshalaı mánde 41%-ǵa ósip, $196 mln qurady.

Top-10 ónimge dándi daqyldar (bıdaı, arpa), un, ósimdik maıy jáne maıly tuqymdar, maqta talshyǵy, azyqtyq daqyldar, kondıterlik ónimder kiredi. Perspektıvaly ónimder - et jáne sút ónimderi, soıa, júgeri. Qazaqstandyq aýyl sharýashylyǵy ónimderi Qytaıda joǵary sapaly, ekologııalyq jáne tabıǵı bolyp joǵary baǵalanady.

Qazaqstandyq ónimder úshin Qytaı naryǵyna qol jetkizý saýda aınalymyn ulǵaıtý úshin ǵana emes, sondaı-aq, Qazaqstan aýmaǵynda aýyl sharýashylyǵy ónimderin óńdeýge qytaılyq ınvestıtsııalardy tartý úshin de mańyzdy mánge ıe.