QR AShM úı maldary qandaı aýrýlarǵa qarsy egilip jatqanyn aıtty

ASTANA. QazAqparat - Mal aýrýlaryna qarsy vaktsına egý jumystary josparǵa saı ótýde. Bul týraly búgin Úkimet otyrysynda fıtosanıtarııalyq qaýipsizdiktiń jaı-kúıi týraly baıandaǵan QR Aýyl sharýashylyǵy birinshi vıtse-mınıstri Arman Evnıev aıtty, dep habarlaıdy QazAqparat.

«2018 jylǵy veterınarııalyq-profılaktıkalyq is-sharalardyń jospary qazanda bekitildi. Bul  tolyqtaı veterınarııalyq preparattardy aýdandarǵa deıin tasymaldaý boıynsha kórsetiletin qyzmetterdi ýaqytyly júzege asyrýǵa múmkindik berdi. Asa qaýipti aýrýlar boıynsha vaktsınatsııalaý kólemine kúndelikti monıtorıng júrgize otyryp, komıtet mamandarynyń óńirlerge baryp, manıpýlıatsııa júrgizýge baqylaý uıymdastyryldy. Jalpy alǵanda vaktsınatsııa jospardaǵydaı ótýde», -  dedi vıtse-mınıstr

Sonymen, onyń dereginshe, 2018 jylǵy 2 sáýirdegi jaǵdaı boıynsha 6,9 mln bas malǵa nemese maldyń 90 paıyzyna aýsylǵa qarsy vaktsına egildi. Sibir jarasyna qarsy ekpe jalpy mal basynyń 82 paıyzyna, nodýlıarly dermatıtke qarsy 85 paıyzyna jasaldy.

«Oblystyq, Astana jáne Almaty qalalarynyń ákimdikteri qoldanystaǵy 3 609 mal qorymdary boıynsha tıisti jumystardy júrgizý qajet. Jalpy asa qaýipti zııandy organızmder boıynsha ahýal jáne veterınarııalyq-sanıtarııalyq obektilerdiń jaı-kúıi turaqty baqylaýda», - dedi ol.

Arman Evnıevtiń aıtýynsha, 2018 jyldyń 19-22 aqpany aralyǵyndaǵy kezeńde Halyqaralyq epızootııalyq bıýronyń halyqaralyq sarapshylary iri qara maldyń nodýlıarly dermatıti boıynsha mıssııa ótkizdi.

«Halyqaralyq sarapshylardyń aldyn ala qorytyndysy boıynsha ınfektsııany oqshaýlaý boıynsha veterınarııalyq qyzmettiń jumysy oń baǵalandy. Bul janýarlar men janýarlardan alynatyn ónimderdiń eksportyn arttyrýǵa yqpal etedi», -  dedi vıtse-mınıstr.