QR AShM: Tamaq ónerkásibin damytýǵa QQS kedergi keltirýde
ASTANA. QazAqparat -Qosylǵan qun salyǵy (QQS) aýyl sharýashylyǵy ónimderin qaıta óńdeýdi damytýǵa tosqaýyl bolyp otyr. Búgin Májiliste «Ósimdik sharýashylyǵy ónimin óńdeýdiń problemalary týraly» taqyryptaǵy dóńgelek ústelde QR Aýyl sharýashylyǵy vıtse-mınıstri Tóleýtaı Raqymbekov osylaı málim etti, dep habarlaıdy QazAqparat.
«Aýyl sharýashylyǵy ónimin qaıta óńdeý salasynda eń basty máselelerdiń biri bastapqydan qosylǵan qun salyǵyna baılanysty problema dep oılaımyn. Atap aıtqanda, osy saladaǵy óńdeý isi eń birinshi bolyp atalǵan problemaǵa tap boldy. Óńdeý ónerkásibi daıyn óniminiń ózindik qunynda 50 protsentin shıkizat quraıdy. Bul óz kezeginde aýyl sharýashylyǵy ónimi. Ózderińiz bilesizder, aýyl sharýashylyǵy óniminiń 90 paıyzdan astamy jeke qosalqy jáne shaǵyn sharýashylyqtarda óndiriledi jáne olar QQS tólemeıdi.
Nátıjesinde, QQS tóleý turǵysynda 90 paıyz júkteme óńdeýshi kásiporyndardyń ıyǵyna artylady. Bul salyq túri taýarlardy artyq óndirýmen kúres úshin Batys Eýropa elderinde engizilgen bolatyn. Kez kelgen jaǵdaıda QQS-tyń túpkilikti tóleýshisi - ol tutynýshy.
Qosylǵan qun salyǵynyń paıdaly nemese zııany turǵysyndaǵy yqpalyn bizdiń dúkenderdiń sórelerinen baıqaýǵa bolady. Kóp jaǵdaıda Reseıden jetkizilgen azyq-túlik taýarlary taralǵan»,-dedi Raqymbekov.
Onyń atap ótýinshe, Reseı men Qazaqstanda bastapqy ustanymdar birdeı boldy, sonymen qatar tabıǵı-klımattyq jaǵdaı, sýbsıdııalar jáne memlekettik qoldaýdyń ózge de túrleri shamalas deńgeıde qalyptasty. Biraq qazaqstandyq taǵam ónerkásibiniń keıin qalýynyń negizgi sebebi ol qosylǵan qun salyǵynyń eseptelýine, tóleýine jáne qaıtarýyna qatysty bolyp otyr. Degenmen de Reseıde QQS-tyń jalpy mólsherlemesi 18 paıyz, al Qazaqstanda 12 paıyz.
T. Raqymbekovtyń aıtýynsha, QQS engizilgen sátten bastap Reseıde qosylǵan qun salyǵyn tólemeıtinderden (jeke úı sharýashylyqtary men fermerler) shıkizat satyp alýmen baılanysty óńdeýshi ári tamaq ónerkásipteriniń barlyq aınalymyn atalǵan salyqtan bosatty.
Raqymbekovtyń sózine qaraǵanda, 2021 jylǵa deıingi agroónerkásip keshendi damytýdyń memlekettik baǵdarlamasy aıasynda qanatqaqty joba retinde óndirispen, óńdeýmen, ımportpen jáne satýmen baılanysty barlyq aınalymdy QQS-tan bosatýǵa bolady. Bul turǵyda AÓK barsha ekonomıkanyń draıveri retinde aıqyndalǵandyqtan, osy tektes qadamdardy iske asyrǵan durys bolar edi.
