QR AShM sapasyz vaktsına máselesin zań turǵysynda rettemek

ASTANA. QazAqparat -Qazaqstande vaktsına óndirisine lıtsenzııalardy qaıtaryp alý úshin zańnamaǵa túzetýler engizilýde. Bul týraly búgin QR Parlamenti Senatynda QR Aýyl sharaýashylyǵy birinshi vıtse-mınıstri Qaırat Aıtýǵanov málim etti, dep habarlaıdy QazAqparat.

«Sapasyz vaktsınalardy óndirý sebepteriniń biri ekpeni qysqa merzim ishinde jetkizýge baılanysty bolyp otyr. Máselen, mınıstrlik jarııalaǵan konkýrstyń nátıjesi boıynsha óndirýshi vaktsınany kelisim jasalǵan sátten bastap 15 kúnniń ishinde jetkizýge mindetti boldy.
Alaıda, bul óndirý tehnologııasyn saqtaýǵa múmkindik bermedi. Ol úshin kem degende eki jarym aı ýaqyt kerek. Problemany sheshý turǵysynda konkýrstyq qujattama ózgertilip, jyl saıynǵy konkýrstyq rásimderdi qańtardyń birinshi onkúndiginen kesh bastamaý týraly sheshim qabyldandy. Buryndary bul sharalar sáýirde ótkiziletin»,-dedi Aıtýǵanov Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń múshelerimen kezdesý barysynda.

Onyń sózine qaraǵanda, zańnamada veterınarlyq preparattardyń óndirýshilerinen lıtsenzııalardy qaıtarý tetigi rettelmegen. Qazirgi kezde lıtsenzııalar merzimsiz, ıaǵnı olardyń merzimi shektelmegen. Sonymen qatar lıtsezııalardy qaıtarý úshin negizdemeler eskertilmegen. Osyǵan baılanysty zańnamada tıisti negizderdi qarastyratyn ózgertýler engizilip otyr.