QR AShM Reseıdiń Omby oblysyna jamandat aýrýynyń juqpasy Qazaqstannan keldi degen faktini joqqa shyǵardy

Bul týraly búgin ótken baspasóz máslıhatynda QR AShM Agroónerkásip keshenindegi memlekettik ınspektsııa komıteti basqarmasynyń bastyǵy Aqyn Yspulaev málim etti.

Eske sala keteıik, buǵan deıin reseılik basylymdarda jarııalanǵandaı, tamyzdyń 2-si kúni Omby oblysy Tıýkala aýdanyna qarasty Bekıshevo aýylyndaǵy sharýashylyqtardyń birinde jamandat (jylqyda bolatyn sibir jarasy) aýrýynyń juqpasy anyqtaldy. Jergilikti turǵyn Ybyraı Áıtenovtyń jeke sharýashylyǵynda etke satý úshin birneshe jylqy soıylǵannan keıin kelesi kúni, qasapshylyqqa qatysqan alty adam aýrýhanaǵa jetkizildi. Jylqy etinen adamdarǵa juqqan kúıdirgi aýrýy zerthanalyq túrde anyqtaldy. Olardyń bireýi aýrýhanada qaza boldy. Qalǵan beseýiniń jaǵdaılary áli kúnge deıin aýyr.

«Rossııskaıa gazeta» basylymy Y.Áıtenovke Qazaqstannan mal kontrabandasymen aınalysty degen kúdik keltirilip otyrǵandyǵyn aıtady. Onyń jeke sharýashylyǵynda 500 bas qoı, 47 bas jylqy jáne 63 bas iri qara mal bar.

Basylym, Ombyda anyqtalǵan mal aýrýy, jýyrda atalmysh juqpa anyqtalǵan Pavlodar oblysynan kelgendigin jazǵan.

«Sol aqparat boıynsha QR AShM jeke tekserýin júrgizdi. Nátıjesinde, bizdiń veterınarlyq qujattarymyzǵa sáıkes, Pavlodar oblysynan Omby oblysyna ettiń jetkizilý faktisi joqqa shyǵaryldy», - deıdi ol.

A.Yspulaevtyń aıtýynsha, Pavlodardan Ombyǵa jylqy etin satýǵa shyǵarý, birinshiden, ekonomıkalyq jaǵynan tıimsiz. Sebebi, onda jylqy etiniń baǵasy bizdegimen salystyrǵanda áldeqaıda arzan. Sonymen birge, aýrý shyqqan Pavlodar oblysynan Ombynyń Tıýkala aýdanyna deıingi ara qashyqtyq 600 shaqyrymdy quraıdy», - dep atap ótti Yspulaev.

Sondaı-aq, onyń sózine qaraǵanda, bul indet bir memlekettiń aýmaǵynan ekinshi memleketke ótip ketetin aýsyl, sheshek jáne basqa da juqpalar sııaqty transshekaralyq sanattaǵy aýrýlarǵa jatpaıdy. Bul aýrýdyń aldyn alýdyń bir ǵana joly - oǵan qarsy vaktsınatsııa júrgizý.

«Atalmysh basylymda Reseıdiń aýyl sharýashylyǵyndaǵy qadaǵalaý qyzmeti (RAShQQ) maldarǵa egýdi júrgizbegendigin moıyndap otyrǵandyǵy týraly jazylǵan. Tamyzdyń 2-sinen bastap búgingi kúnge deıin RAShQQ-tyń juqpa boıynsha eshbir málimetteri túsken joq. ıAǵnı, aǵymdaǵy jaǵdaı týraly, onyń shyqqan oshaǵy, sebebi men ony joıý boıynsha qolǵa alynyp jatqan sharalar týraly habar joq», - dedi ol.

Tekseris nátıjeleri boıynsha qazaqstandyq taraptyń qolǵa alǵan sharalaryna toqtalatyn bolsaq, tamyz aıynyń 6-synan bastap QR AShM Omby oblysynan Qazaqstanǵa mal ónimderin jetkizýge shekteýler qoıdy.

Al Pavlodar oblysynda búgingi kúni epızootıkalyq jáne epıdemıologııalyq jaǵdaı turaqtandy. Bul aýmaqtan karantın ótken shilde aıynyń 9-y kúni alynǵan bolatyn. Eske sala keteıik, juqpamen tikeleı qatynasta bolǵan 7 adamnyń 2-ýi qaıtys boldy.