QR AShM Mal sharýashylyǵy departamentiniń dırektoryna qatysty jańa qylmystyq is qozǵaldy

ASTANA. QazAqparat - 6 aqpanda Astana qalalyq qarjy polıtsııasy departamenti QR Aýyl sharýashylyǵy mınıstrligi Mal sharýashylyǵy departamentiniń dırektory M. Baqtybaevqa qatysty zańdy kásipkerlik qyzmetke kedergi jasaý faktisi boıynsha qylmystyq is qozǵady.

Bul týraly QR Ekonomıkalyq qylmysqa jáne sybaılas jemqorlyqqa qarsy kúres agenttiginiń baspasóz qyzmetinen habarlady.

Oǵan qyzmet babyn paıdalanyp, «Mal sharýashylyǵy jáne veterınarııanyń ǵylymı-ınnovatsııalyq ortalyǵy» JShS-ǵa paıda alyp berý úshin basqa kásiporynnyń zańdy kásipkerlik qyzmetine kedergi keltirý arqyly oǵan 19,5 mln. teńgege zalal keltirdi degen kúdik keltirilýde.

Eske salsaq, Baqtybaev 2013 jylǵy 30 jeltoqsanda memlekettik satyp alýdyń kelisimshartyna qol qoıýǵa kómekteskeni úshin «Mal sharýashylyǵy jáne veterınarııanyń ǵylymı-ınnovatsııalyq ortalyǵy» JShS bas dırektorynan 720 myń teńge para alý ústinde ustalǵan bolatyn.