QR AShM: Kúrish pen maqta alqaby áli de qysqarady

NUR-SULTAN. QazAqparat – QR Aýyl sharýashylyǵy mınıstriniń birinshi orynbasary Aıdarbek Saparov Úkimet otyrysynda agroónerkásiptik keshendi damytýdyń ulttyq jobasy men 2030 jylǵa deıingi tujyrymdamasy aıasynda parnıktik gaz shyǵaryndylaryn azaıtý josparlanǵanyn aıtty, dep habarlaıdy QazAqparat tilshisi.

«Mal sharýashylyǵynda metan shyǵaryndylaryn azaıtý úshin kóń men qus sańǵyryǵyn óńdeıtin jabdyqqa 25% ınvestıtsııalyq sýbsıdııalaý tólene bastady. Ósimdik sharýashylyǵynda kúrish, maqta sııaqty sýdy kóp qajet etetin daqyldardyń alqabyn azaıtý úshin egis qurylymyn ártaraptandyrý jalǵasady», - dedi Aıdarbek Saparov.

Onyń aıtýynsha, zamanaýı tsıfrlyq tehnologııalardy engizý, ǵaryshtyq monıtorıng pen jerdi qashyqtan zondtaý nátıjelerin paıdalaný tehnologııalary salaǵa dendep enip keledi.

«Agrotehnologııalardy saqtaý úshin qazirgi zamanǵy tuqym sorttary men tyńaıtqyshtar, ósimdik qorǵaýǵa arnalǵan bıologııalyq quraldar satyp alýǵa da qoldaý kórsetiledi. Bul rette, AÓK damytý tujyrymdamasy sheńberinde organıkalyq tyńaıtqyshtardy satyp alý kezinde aýyl sharýashylyǵy taýaryn óndirýshilerdiń shyǵyndaryn óteý kózdelmek. Salany tehnıkalyq turǵyda jaraqtandyrý úshin aýyl sharýashylyǵy tehnıkasyn satyp alýdy, jeńildetilgen lızıngti sýbsıdııalaý, otandyq aýyl sharýashylyǵy mashınasyn jasaýdy damytý baǵdarlamalaryn aýqymdy iske asyrý jalǵasady», - degen vıtse-mınıstr ylǵal únemdeý sharalaryna toqtaldy.

«Sondaı-aq, sý únemdeý tehnologııalaryn engizý, gıdromelıoratıvtik qyzmettiń materıaldyq-tehnıkalyq bazasyn jaqsartý jáne olardyń qyzmet aımaǵyn keńeıtý arqyly sýarmaly eginshilikti damytý boıynsha sharalar qabyldanýda. Bul rette, zamanaýı sýarý júıelerin satyp alý qunynyń 50% deıin ınvestıtsııalyq sýbsıdııalaý qarastyrylǵan», - dep túıindedi Aıdarbek Saparov.