QR AShM: Qazaqstanda búgingi tańda 20,8 mln tonna shóp daıyndaldy
Shtab jumysyna onyń músheleri, aımaq basshylarynyń orynbasarlary qatysty, dep habarlaıdy QazAqparat QR aýyl sharýashylyǵyn mınıstrliginiń baspasóz qyzmetine silteme jasap.
Otyrysty ashqan Erbol Qarashókeev Jambyl oblysyndaǵy qaıǵyly oqıǵalardan qaza tapqandardyń týystary men jaqyndaryna kóńil aıtyp, zardap shekkenderdiń tezirek saýyǵyp ketýine tilektestigin bildirdi.
Birinshi vıtse-mınıstr Aıdarbek Saparov aımaqtardaǵy jem-shóp óndirisiniń qazirgi jaǵdaıy jáne jedel shtabtyń aldyńǵy otyrystarynda berilgen tapsyrmalardyń oryndalý barysy týraly baıandady.
Mınıstrliktiń deregi boıynsha búgingi kúni 20,8 mln.tonna shóp daıyndalǵan, bul jospardyń 88%. Pishendeme daıyndaý jospardyń 76%-yn, súrlem daıyndaý 8%-yn quraıdy.
Vedomstvo basshysy aımaqtardaǵy jem-shóp daıyndaý isiniń qazirgi jaǵdaıyn qanaǵattanarlyq dep baǵalady.
Júrgizilip jatqan jumystar týraly Mańǵystaý, Qyzylorda jáne Atyraý oblystarynyń shtab ókilderi baıandady.
Mınıstrdiń mindetin atqarýshy atqarýshylyq tártipti kúsheıtý jáne jem-shóp daıyndaý qarqynyn jedeldetý qajettigin atap ótti.
Mańǵystaý jáne Qyzylorda oblystaryna Úkimet rezervinen bólingen qarajatty bólý jumysyn jandandyrý tapsyryldy. Vedomstvo basshysy atap ótkendeı, Úkimet qarjyny ýaqytynda bóldi, al ákimdikterdiń mindeti shuǵyl túrde bul qarjyny sharýalarǵa jetkizý.
«Aqsha bar, mal azyǵyn daıyndaý maýsymy ótip barady, jeke qosalqy sharýashylyqtar men sharýa qojalyqtary bul qarajatty asyǵa kútip otyr», - dedi mınıstrdiń mindetin atqarýshy.
Mańǵystaý oblysynyń ákimdigi josparlanǵan shóptiń 48%-yn daıyndady, mınıstrdiń m.a. jem-shóp jınaý jumystaryn jyldamdatý úshin barlyq sharany qabyldaýdy tapsyrdy.
«Bıyl kúıi tómen malmen qysqa kirýge májbúrmiz. Eger daıyndyǵymyz nashar bolsa, kúrdeli jaǵdaıǵa tap bolatynymyz anyq. Barlyq jaýapkershilik sizderge júkteletinin umytpańyzdar. Bizdiń qatelik jasaýǵa quqyǵymyz joq», - dedi jedel shtab tóraǵasy.
Taǵy bir mańyzdy másele – buqaralyq aqparat quraldarymen tyǵyz qarym-qatynas ornatý. Halyqqa naqty aqparatty der kezinde jetpese, qoǵamda jumys júrgizilmeı, sharýalar qurǵaqshylyqtan zardap shegip, qysty jem-shópsiz kútip otyrǵandaı pikir qalyptasady.
Osyǵan baılanysty, mınıstrdiń mindetin atqarýshy osy baǵyttaǵy jumysty kúsheıtýdi jáne oblystardaǵy mal azyǵyn daıyndaý barysyn jarııalap otyrýdy tapsyrdy.