QR AShM elevatorlardaǵy astyqty demalyssyz tıeýdi usynyp otyr
ASTANA. 9 sáýir. QazAqparat - Aýyl sharýashylyǵy mınıstrligi elevatorlardaǵy astyqty demalyssyz tıeý arqyly eksport áleýetin arttyrýdy usynady.
Bul týraly búgin Úkimettiń selektorlyq rejimdegi otyrysynda atalǵan vedomstvonyń basshysy Asyljan Mamytbekov málim etti.
Elevator qýattaryn bosatý maqsatynda astyqty eksportqa jóneltý qarqynyn arttyrý qajettigine toqtalǵan ol: «Vagondardyń jetispeýshilik problemasy bar, degenmen ol sheshilýde. Sonymen qatar jergilikti jerlerde de problema oryn alýda. Ásirese, mereke kúnderi elevatorlar jabylyp, astyq tıelmeıdi. Muny jergilikti atqarýshy organdar baqylaýǵa alyp, árbir kúndi joǵaltpaı demalys jáne mereke kúnderi de astyq tıeýdi qamtamasyz etýi tıis», - dedi ol.
Onyń alǵa tartqan derekterine qaraǵanda, elimiz aı saıyn shamamen 1 mıllıon tonna astyqty, 300 myń tonna undy eksportqa shyǵaryp otyr. Biraq bul kórsetkish jańa ónim jınalǵanǵa deıin elevatorlardy bosatýǵa jetkiliksiz.
