QR AShM egis jáne egin jınaý jumystaryna bólinetin qarjy kólemin eki esege arttyrmaq
QR Aýyl sharýashylyǵy mınıstrligi bul másele boıynsha kóktemgi egis jumystaryn sapaly júrgizýge daıyndyq, onyń ishinde qarjylandyrýdy ulǵaıtý boıynsha barlyq qajetti sharalar qabyldanyp jatqanyn habarlaıdy.
Buǵan deıin habarlanǵandaı, vedomstvo bıýdjettik kredıtteýdiń jalpy somasyn 140 mlrd teńgege deıin jetkize otyryp, qosymsha qarjylandyrý kólemin 70 mlrd teńgege ulǵaıtý máselesin pysyqtaýda, bul shamamen 1 300 sharýashylyqty qosymsha qarjylandyrýǵa múmkindik beredi.
«Keń dala» baǵdarlamasy aıasynda 77,6 mlrd teńgege aýyl sharýashylyǵy taýaryn óndirýshilerden 2673 ótinim resmı túrde kelip tústi.
«Azyq-túlik kelisim shart korporatsııasy» UK» AQ forvardtyq satyp alý baǵdarlamasy boıynsha qarjylandyrýǵa 80 mlrd teńgege deıin jiberedi, bul ótken jylǵy deńgeıden 2 ese joǵary. Qazirdiń ózinde 66 mlrd teńgeden astam somaǵa 374 ótinim kelip tústi, 53,5 mlrd teńge somaǵa 176 AShTÓ qarjylandyryldy.
Tuqymmen qamtamasyz etýge keletin bolsaq, oblys ákimdikteriniń jedel aqparaty boıynsha 2,3 mln tonna tuqym sebildi, bul jospardyń 100,8% quraıdy, onyń ishinde dándi daqyldar tuqymy – 2,0 mln tonna (jospardyń 101,3%), maıly daqyldar – 89,1 myń tonna (jospardyń 96,2%), jem-shóp-15,3 myń tonna (jospardyń 80,4%), kartop – 237,3 myń tonna (jospardyń 99,9%).
Tehnıkanyń daıyndyǵy shamamen 92% qurap otyr, 400 myń tonna kóleminde dızel otyny bólindi. Bul ótken jylmen salystyrǵanda 20 myń tonnaǵa artyq. Oblystardyń ákimdikteri munaı óńdeıtin zaýyttardan óńirlerge jáne keıinnen AShTÓ ótkizý úshin dızel otynyn satyp alýdy jáne jetkizýdi qamtamasyz etetin operatorlardy aıqyndaý jónindegi is-sharalardy aıaqtap jatyr. Ońtústik óńirlerde tıep-jóneltý bastaldy.
Pestıtsıdterdi sýbsıdııalaý baǵdarlamasyn qarjylandyrý 29,7 mlrd teńge kóleminde qamtamasyz etildi, bul egis alańyn 100% óńdeýge múmkindik beredi.
Shamamen 659 myń tonna tyńaıtqysh engizý josparlanǵan. Tyńaıtqyshtardy 226 myń tonna kóleminde jetkizýge kelisim-shart jasaldy, aýyl sharýashylyǵy salasy mamandaryna 56 myń tonnaǵa jýyq tyńaıtqysh tıeldi. Qoımalardaǵy qorlar, sonyń ishinde ımporttyq tyńaıtqyshtar qalyptasty.
Joǵaryda aıtylǵandardy eskere otyryp, QR Aýyl sharýashylyǵy mınıstrligi kóktemgi egis jumystaryn tabysty júrgizý úshin barlyq qajetti sheshimder men sharalar ýaqtyly qabyldanyp jatqanyn, agrarshylardyń daıyndyǵy joǵary ekenin atap ótedi.
Sonymen qatar, Aýyl sharýashylyǵy mınıstrligi óz qyzmetinde ótken jylǵy qýańshylyqpen, logıstıkalyq tizbekterdiń buzylýymen, shıkizat pen ónim baǵasynyń ósýimen, sondaı-aq álemdegi geosaıası jaǵdaıdyń shıelenisýimen baılanysty kúrdeli jaǵdaıdy eskeredi.
«Týyndaıtyn táýekelderdi nıvelırleý úshin mınıstrlik ortalyq jáne jergilikti atqarýshy organdarmen, bıznes ókilderimen jáne jurtshylyqpen tyǵyz ózara is-qımyl jasaı otyryp, óz saıasatyna túzetý júrgizedi»,-delingen habarlamada.