QR AShM brakonerlermen qaqtyǵysta qaza tapqan ınspektordyń týystaryna kóńil aıtty
Osydan eki kún buryn 5 kıik atqan brakonerlermen qaqtyǵysta aýyr jaraqat alǵan «Ohotzooprom» ÓB» RMQK ınspektory Erlan Nurǵalıev búgin tańerteń qaıtys bolǵan edi.
«E.Nurǵalıev qazaq dalasynyń sımvoly aqbókenderdi jáne kórkem tabıǵatymyzdy qorǵaýda óziniń qyzmettik mindetin adal oryndaý kezinde qaza tapty. Qazaqstan Respýblıkasynyń Aýyl sharýashylyǵy mınıstrligi Erlan Nurǵalıevtiń týǵan-týystary men jaqyndarynyń qaıǵysyna ortaqtasyp, kóńil aıtady» delingen habarlamada.
Eske salsaq, ol Qaraǵandy oblysynyń Nura aýdanynda sırek kezdesetin jáne joıylyp ketý qaýpi tóngen jabaıy ańdar men aqbókenderdi qorǵaý kezinde brakonerlerdiń qolynan aýyr jaraqat alǵan bolatyn.
Ol bir táýlikten astam ýaqytta Astana qalasyndaǵy №1 aýrýhananyń qarqyndy terapııa bóliminde ómir úshin arpalysty.
Nurǵalıev Erlan Balǵabekovıch 1966 jyly Aqmola oblysynda dúnıege kelgen. Bilimi - dene shynyqtyrý jáne áskerı daıyndyq oqytýshysy. 2012 jylǵy naýryzdan bastap «Ohotzooprom» ÓB» RMQK Qaraǵandy tirek pýnktinde Ortalyq aımaqtyq fılıaldyń ınspektory qyzmetin atqardy.