QR AShM boıynda derti bar iri qaraǵa baılanysty Avstrııanyń veterınarlyq qyzmetin aıypty dep sanaıdy

ASTANA. 11 aqpan. QazAqparat - Avstrııanyń veterınarlyq qyzmeti Qazaqstan satyp alǵan iri qara maldyń arasynda qozdyrǵysh vırýstyq dıareıasy bar janýarlar bolýy múmkin ekenin qazaqstandyq tarapty eskertpegen. Bul týraly búgin Astanada ótken brıfıngte QR Aýyl sharýashylyǵy vıtse-mınıstri Gúlmıra Isaeva málim etti.

Onyń sózine qaraǵanda, Soltústik Qazaqstan oblysyna jetkizilgen 722 bas iri qara Avstrııanyń 400-ge jýyq fermerlik sharýashylyqtarynan jınalyp elimizge tasymaldanǵan. Sonyń ishinde atalǵan sharýashylyqtardyń bir bóligi iri qara maldyń vırýstyq dıareıasy boıynsha belgili bolǵan.

Sonymen qatar, ótken jylǵy jazdyń aıaǵynda Avstrııadaǵy iri qarany tekserý barysynda janýarlardyń 90 paıyzyna deıingi kóleminiń qanynda Shmallenberg vırýsyna antıdeneler tabylǵan. Buǵan qosa, atalǵan toptamada jetkizilgen maldyń arasynda ınfektsııalyq rınotraheıt juqtyrǵandar anyqtaldy.

G. Isaevanyń aıtýynsha, qazirgi kezde avstrııalyq tarap qazaqstandyq zerthanalardaǵy zertteýlerdiń nátıjesin moıyndamaı otyr. Sondyqtan da materıaldar zertteý úshin Halyqaralyq epızootıkalyq bıýronyń referent-zerthanalaryna jetkizilgen. Olar óz kezeginde qazaqstandyq veterınarlar qoıǵan dıagnozdy quptaǵan eken.