QR AShM: Bıylǵy astyq kólemi ótken jylǵy deńgeıde bolmaq

ASTANA. QazAqparat - Bıylǵy jylǵy astyq kólemi ótken jylǵy deńgeıde boljanyp otyr. Bul týraly búgin Ortalyq kommýnıkatsııalar qyzmetindegi baspasóz máslıhatynda Ósimdik sharýashylyǵy ónimderin óndirý men qaıta óńdeý departamentiniń dırektory Ajar Qadjybekova málim etti.

«Qazirgi kezde bundaı zertteýler júrgizetin ǵylymı-zertteý ınstıtýttary astyq shyǵymdylyǵy ótken jyldyń deńgeıinde bolatynyn boljap otyr. Degenmen de bul klımattyq jaǵdaıǵa baılanysty ekeni túsinikti. Astyq eksporty boıynsha bizde dástúrli naryqtar ashyq jáne búginde onyń baǵyttaryn keńeıtýdemiz. Qazirgi kezde astyqty jóneltý úshin Qytaı men Iran naryqtaryn qarastyryp jatyrmyz. Bıyl astyq eksporty byltyrǵyǵa qaraǵanda edáýir artyq bolady»,-dedi departament dırektory.

QR AShM málimetine qaraǵanda, 2016 jyly aýyl sharýashylyǵy daqyldarynyń jalpy aýdany 21,6 mln. gektardy qamtymaq, onyń ishinde 15,2 mln. gektaryna astyq daqyldary egiledi.