QR AShM bilim granttaryn paıyzsyz nesıelerge aýystyrýdy usyndy

ASTANA. QazAqparat - Agrarlyq joǵary oqý oryndaryn támamdaǵan túlekterdiń basqa salaǵa bet burýyn doǵaratyn qadamdar kerek. Bul týraly búgin Májiliste «Ósimdik sharýashylyǵy ónimin óńdeýdiń problemalary týraly» taqyryptaǵy dóńgelek ústelde QR Aýyl sharýashylyǵy vıtse-mınıstri Tóleýtaı Raqymbekov málim etti, dep habarlaıdy QazAqparat.

Onyń sózine qaraǵanda, kadrlardy daıarlaý máselesin sheshý úshin bul sharalarǵa kásiporyndardyń ózderin tartý kerek, bul rette olar joǵary oqý oryndary aldynda tapsyrys berýshi retinde áreket etýi tıis. Osy oraıda bilim granttaryn usynýdan paıyzsyz nesıelerdi bólýge aýysý múmkindigin qarastyrǵan jón, ıaǵnı bul paıyzsyz nesıeler óndiriste eńbekpen óteý kezinde sýbsıdııalanatyn bolady.

«Bundaı tártip búginde birqatar elderde engizilgen. Atap aıtqanda, bul qadam alǵan bilimiń boıynsha jumys istegen jaǵdaıda týra granttaǵy sekildi bolady»,-dedi vıtse-mınıstr.

Onyń atap ótýinshe, qazirgi kezde agrarlyq joǵary oqý oryndarynyń veterınarlyq, agronomdyq jáne ınjenerlik fakýltetterin támamdaǵan kóptegen túlekteri dıplomyn alǵannan keıin, «zańger», nemese «ekonomıst» mamandyqtary boıynsha basqa JOO-larǵa túsedi.

«Ózderińiz bilesizder, jas mamandardyń kóbisi ekinshi dıplom úshin basqa oqý oryndaryna túsip jatady»,-dedi T. Raqymbekov.