QR AShM basshysy: Men tuqym máselesin birinshi orynǵa qoıamyn
«Bizge eńbek ónimdiligi talabyn qoıyp jatyr. Ósimdik sharýashylyǵynda eńbek ónimdiligi úshin ne kerektigin ańǵarý úshin úlken agrarshy bolýdyń qajeti shamaly. Eń birinshiden, tuqym kerek. Tuqym máselesi asa ózekti. Bizde ókinishke qaraı, statıstıkaǵa sáıkes, tuqymnyń 18-20 paıyzy taýarly reprodýktsııa ekenin kórip otyrmyz. Biraq, sharýashylyqtarda júrgizilgen saýalnama men taldaý bul kórsetkishtiń 50 paıyzdan asatynynan habar beredi. Nege osylaı ekenin túsine almaımyn», - deıdi mınıstr.
Shókeevtiń paıymynsha, fermerlerdiń ózi suryptalǵan tuqymdy egýi kerek.
«Qurylǵylar eski. Eski ádispen jumys júrgizilip jatyr. Qoldarynan keletini mınıstrlikke kelip sýbsıdııa suraý. Olaı bolmaıdy! Álemde eshkim olaı jumys istemeıdi. Biz bárimiz olardyń bárin ózin-ózi retteıtin uıym retinde qurýymyz kerek», - deıdi ol.
Ómirzaq Shókeev sharýashylyqtardy emes, tuqymdardy satyp alatyndardy sýbsıdııalaý kerektigin másele etip kóterdi.
«Tuqymnyń qoldanatyn adamdarǵa berilgeni durys. Importty, naryqty ashýymyz kerek. Básekelestikke jol bergen abzal. Tuqymdy alý ońaı emes. Biraq, tuqymsyz ónimdilikti qalaı arttyrýǵa bolady?! Taýarly tuqymdy qoldanatyn kompanııa nemese fermer múlde basqa sýbsıdııalarǵa qol jetkize almaıtyndaı sýbsıdııa júıesin ázirleýimiz kerek. Tuqymdy men birinshi orynǵa shyǵaramyn. Biz tuqym máselesin retke keltirýge tıispiz», - dep túıdi sózin Ómirzaq Shókeev.