QR AShM: 2012 jyly 37 aýdandyq veterınarlyq zerthana qurylysy aıaqtalady

Búgin Aýyl sharýashylyǵy mınıstrliginde ótken brıfıng barysynda Veterınarlyq baqylaý jáne qadaǵalaý komıtetiniń tóraǵasy Nyǵmet Jaqypbaev osylaı málim etti.

«Jalpy alǵanda 2011 jyly respýblıka boıynsha iri qara maldy ıdentıfıkatsııalaý jumystary aıaqtaldy. Búgingi kúni respýblıkamyzda 1 myń 558 mal soıý nysany bar. Onyń ishinde 38 et óńdeý kásiporny, 207 mal soıý pýnkti jáne 1313 mal soıý alańy jumys istep tur», - deıdi N.Jaqypbaev.

Onyń aıtýynsha, qazirgi tańda halyqaralyq uıymdar yntymaqtastyǵymen veterınarııa júıesin jetildirý, soǵan qosa veterınarlyq zerthanalardyń qurylysy men olardyń materıaldyq-tehnıkalyq jaǵdaıyn jaǵyrtý jumystary turaqty negizde jalǵasatyn bolady.

«Sońǵy jyldary 11 oblystyq, 15 aýdandyq veterınarlyq zerthanalar salyndy. 2012 jyly 37 aýdandyq veterınarlyq zerthananyń qurylysyn aıaqtaý, sonymen qosa  63 aýdandyq zerthananyń qurylysyn bastaý josparlanyp otyr. Jalpy respýblıka boıynsha Elbasy tapsyrmasyna sáıkes, zamanaýı qurylǵylarmen jabdyqtalǵan 126 veterınarlyq zerthana salynbaq. Bular ónimderdiń qaýipsizdik sapasyna jaýap beretin bolady», - deıdi komıtet tóraǵasy.