QR Ánuranyn shatastyryp qoıǵan RF Sambo federatsııasy keshirim surady
ASTANA. QazAqparat - Sochıde ótken sambodan Álem chempıonatynda Qazaqstannyń Ánuranynyń shatasyp qoıylýyna baılanysty RF Sambo federatsııasy keshirim surady. Bul týraly «QazAqparat» HAA tilshisine QR Mádenıet jáne sport mınıstrliginiń Sport jáne dene shynyqtyrý isteri komıtetiniń baspasóz hatshysy Raýhan Toǵymbaeva habarlady.
«Qarasha aıynyń 10-13 qarasha aralyǵynda Reseıdiń Sochı qalasynda Álem chempıonaty ótti. Sol chempıonatta qazaqstandyq Eset Qýanovty marapattaý barysynda Qazaqstannyń eski Ánurany qosylyp ketti. Oǵan negizinen uıymdastyrý komıteti kináli. Biraq, búgin bizge Reseı Federatsııasynyń Sambo federatsııasynan hat kelip tústi. Ol hatta Sambo federatsııasy oryn alǵan jaǵdaıǵa ózderiniń keshirim suraıtyndyqtaryn bildirgen. Hatta osyndaı jaǵdaı tehnıkalyq aqaýlyqqa baılanysty oryn alǵany jazylǵan», - deıdi Raýhan Toǵymbaeva.
Raýhan Toǵymbaevanyń aıtýynsha, RF Sambo federatsııasy olqylyqqa tehnıkalyq aqaý men adamı faktor sebep bolyp otyrǵanyn túsindirgen.
«Ózderińiz biletindeı, bul birinshi ret oryn alǵan jaǵdaı emes. Ánuran 11 jyl buryn jańartylǵanymen, qanshama ret shatastyrý jaǵdaıy tirkeldi. Osyny aldaǵy ýaqytta boldyrmaý úshin jumys júrgiziletin bolady. Bul jumys qalaı júzege asyrylady? Bálkim, eger uıymdastyrý komıteti ózderiniń jumysyn joǵary deńgeıde jasaı almaıtyn bolsa, onda komıtetten arnaıy bir ókil bólemiz be?.. Ol suraqtardy aldaǵy ýaqytta sheshetin bolamyz», - deıdi Raýhan Toǵymbaeva.
