QR Antropologtary men etnologtarynyń qaýymdastyǵy quryldy
ALMATY. QazAqparat - Almatyda QR Memlekettik ortalyq mýzeıinde «Arǵynbaev oqýlary. Qazirgi zaman etnografııa ǵylymy jáne onyń qoǵamdyq jańǵyrýdaǵy róli» halyqaralyq ǵylymı-tájirıbelik konferentsııasy bastaldy, dep habarlaıdy QazAqparat tilshisi.
Osymen shinshi ret ótkizilip otyrǵan aýqymdy sharada Qazaqstan Respýblıkasy Antropologtary men etnologtarynyń qaýymdastyǵy quryldy.
Qaýymdastyq tóraǵasy bolyp tarıh ǵylymdarynyń doktory, ál-Farabı atyndaǵy QazUÝ arheologııa jáne etnografııa, mýzeologııa kafedrasynyń meńgerýshisi Amanjol Qalysh taǵaıyndaldy.
«Bul qaýymdastyqtyń qurylýy 15 jyldan beri kókeıde júrgen oıdyń oryndalýy desek bolady. Qazaqstandaǵy etnolog ǵalymdar árqaısysy ár salada júr. Ár býynnyń arasynda baılanys joq. Shashyrap júrgen etnograftardy bir ortaǵa jınaý kerek. Buryn biz jas býyn bolsaq, qazir aǵa býynbyz. Biz óz bilimimizdi, tájirıbemizdi jas býynǵa jetkizýimiz kerek. Osy maqsatqa jete almaı ketken, ómirden ótken kóptegen ǵalymdarymyz boldy. Onyń ishinde Halel Arǵynbaev ta bar. Aldyńǵy býynnyń kópshilikke jarııalanbaǵan eńbekteri de bar. Baıandama, kitaptar jazý kerek. Osy oraıda, etnologtardyń ǵylymı jýrnalyn shyǵarý qajettiligi týyp otyr. Osy jumystarmen endi qaýymdastyq aınalysatyn bolady», - dedi Amanjol Qalysh.
Sharaǵa alys-jaqyn shetelden etnograf ǵalymdar, tarıhshylar, jas ǵalymdar qatysyp, qazirgi etnologııa ǵylymynyń jaı-kúıi týraly pikir almasty. Sonymen qatar, ataqty ǵalym, professor Halel Arǵynbaevtyń ǵylymı murasy týraly aıtyldy.
Professor Halel Arǵynbaevtyń Qazaqstan Respýblıkasy Memlekettik ortalyq mýzeı qorynda saqtalǵan jeke zattary men qujattarynyń kórmesi ótkizildi.
Atap aıtqanda, kelýshiler Halel Arǵynbaevtyń shapany, HІH ǵasyrdyń sońyndaǵy qazaq halqynyń turmystyq zattary - seńseń ton, teń qap, toqyma, júnjipter, kúmisten jasalǵan er, qorjyn, teriden jasalǵan shelek (kónek), jerjastyq sııaqty kóne búuıymdardy tamashalady.
Konferentsııa barysynda QR Memlekettik ortalyq mýzeıiniń dırektory Nursan Álimbaıdyń «Qazaqtyń etnografııalyq kategorııalar, uǵymdar men ataýlarynyń dástúrli júıesi. 5 tomdyq entsıklopedııasynyń tusaýy kesildi.
