QR Aqparat mınıstrligi Pokemon Go oıynyna tyıym salýǵa qatysty túsinikteme berdi
Atalǵan oıynǵa keıbir elderde qaýipsizdik máselesine baılanysty shekteý engizilgendikten, «QazAqparat» agenttigi vedomstvoǵa tıisti suraý joldaǵan bolatyn.
«QR Aqparat jáne kommýnıkatsııalar mınıstrligi Baılanys, aqparattandyrý jáne buqaralyq aqparat quraldary salasyndaǵy memlekettik baqylaý komıteti Qazaqstan Respýblıkasy aýmaǵynda Pokemon Go oıyny paıdalanýyna shekteýdi qarastyrmaıdy», - dep atap ótilgen resmı jaýapta.
Osy rette atalǵan oıynǵa Komıtet beıtarap qaraıtyndyǵy, Qazaqstan Respýblıkasy zańdaryn buzǵan jaǵdaıda, olardy joıý úshin Komıtetpen shara qoldanylatyny atap ótilgen.
«Qazirgi tańda, komıtet oıyndarǵa shekteý qoıǵan joq. Pokemon Go, basqa da qosymshalar sııaqty belgili shamada qaýipsizdikke qater tóndiredi», - deıdi mınıstrlik ókilderi.
Aıta keteıik, atalǵan oıynǵa Iranda, sondaı-aq musylmandar úshin Malaızııada tyıym salynǵan bolatyn. Reseıde dinı ǵuryptar nysandarynda, beıitterde, eskertkish oryndarynda oıyndaǵy pokemondardy (qubyjyq) aýlaýǵa shekteý engizý týraly usynys jasalýda. Pokemon Go oıynynyń negizgi maqsaty - adamdar kóshe kezip, vırtýaldy túrde mýlt qubyjyqtardy aýlaıdy. Qazaqstanda atalǵan oıyn resmı túrde shyqpasa da, oıynǵa qyzyǵýshylyq tanytqandar jelide tirkelýdiń tásilin taýyp, oıynshylardyń sany kún saıyn artyp keledi.
Atalmysh oıynda ómirdegi naqty jaǵdaı men vırtýaldy kórinis biriktirilip otyr. Adamdar qubyjyqtardy smartfonnyń beıne kamerasy arqyly qarap, keıinnen aýlaýǵa kirisedi. Osy rette baǵdarlama pokemondardyń beınesin qorshaǵan ortadaǵy landshafta ornalastyrady. Budan keıin oıynshy ekran sensoryndaǵy qosymshalarmen qubyjyqtardy ustap alýy kerek.
Jahandyq jelini paıdalanýshylar tarapynan bul oıyn ulttyq qaýipsizdikke qater týdyratynyn, ıaǵnı oıynshylar jergilikti jerlerdiń sýretin túsirip, adamdardyń júrgen jeri men árbir nysan týraly naqty aqparat berýge jol ashyp otyrǵandyǵyn atap ótýde.
