QR AKM: Qazaqstan men Qyrǵyzstan shekarasyndaǵy jaǵdaı turaqty

ASTANA. QazAqparat - Memlekettik shekaranyń qazaqstandyq-qyrǵyzstandyq aýmaǵynda baqylaýdy kúsheıtý boıynsha operatsııa josparly rejımde júrgizilip keledi, dep habarlaıdy QazAqparat QR Aqparat jáne kommýnıkatsııalar mınıstrligine silteme jasap.

«Tekserý jumystary nátıjesinde, kedendik aýmaqtaǵy qorshaýdy buzyp ótý oqıǵasy túsirilgen jelige tarap ketken vıdeonyń birneshe jyl burynǵy ekendigi jáne qazirgi operatsııaǵa esh qatysy joqtyǵy anyqtaldy», - delingen QR AKM jibergen habarlamada.

Mınıstrliktiń habarlaýynsha, baqylaý jumystary «kóleńkeli» ımport kólemin qysqartý týraly EAEO zańnamasyn oryndaý aıasynda júrgizilip jatyr.

Sońǵy táýlikterde júrgizilgen jumystar nátıjesinde tekserýden ótken 131 kólik quraly arasynan óreskel zań buzǵan 13 avtomashına anyqtaldy. Atap aıtqanda, eki kólik salmaq gabarıtiniń parametrlerin asyrǵan, úsh kólikte qazaqstandyq ruqsatnama bolmaǵan jáne 8 kólikten ózge de zań buzýshylyqtar tabylǵan. Joǵaryda atalǵan zań buzýshylyqtar úshin jalpy somasy 285 myń teńgege ákimshilik aıyppul salyndy. Sondaı-aq, 1 jolaýshylar avtobýsy turaqty jolaýshylar tasymalyna ruqsattyń bolmaýynan aıyp turaǵyna ornalastyryldy.

Qazaqstan arqyly QHR-dan Qyrǵyz Respýblıkasyna halyq kóp tutynatyn taýarlar kóptep jetkiziledi.  Qazirgi ýaqytta olarǵa da kedendik tekserý jumystary júrip jatyr. Ázirge 26 kólik quraly tekserilip, 9-ynan eleýli zańbuzýshylyqtar tabyldy. Atap aıtqanda, 60 tonnadan astam halyq tutynatyn taýarlar maǵlumdaýdan ótpegen.

Qorytyndy boıynsha, 1 qylmystyq, 5 ákimshilik is qozǵaldy. Qalǵandary boıynsha kedendik qun anyqtalyp jatyr.

«Sondaı-aq, 10 qazannan beri qazaqstandyq-qyrǵyzstandyq shekarada veterınarlyq baqylaý kúsheıdi. Qazirgi ýaqytta 6 shekaralyq veterınarlyq bekette 32 ınspektor jumys istep jatyr», - dep atap ótilgen mekeme habarlamasynda.

Qazirgi ýaqytta 5 qyrǵyzstandyq sút óńdeý kásipornyn tekserýde jáne jetkizilgen ónimge baqylaý jasaýda quqyqbuzýshylyqtar anyqtalyp,  olarǵa óz ónimderin Qazaqstanǵa jetkizýge tyıym salyndy.

Jekelegen azyq-túlik ónimderine qatysty taǵy 2 qyrǵyz kásipornyna kúsheıtilgen zerthanalyq baqylaý engizildi.

13 qazan kúni «Qarasý» beketinde azyq-túlik ónimderi tıelgen jáne veterınarlyq sertıfıkaty durys toltyrylmaǵan bir mashına toqtatyldy. Júk keri qaıtarylyp, 226 900 teńge kóleminde aıyppul salyndy.

Sonymen birge, salmaǵy 2,5 tonna bolatyn aýylsharýashylyq ónimderi júginiń tańbalanbaǵan partııasy ustaldy. Ónimdi tańbalamaý ulttyq jáne EAEO zańnamalarynyń fıtosanıtarlyq talaptaryn óreskel buzý bolyp sanalady. 

Qyrǵyz taýarlaryna qatysty veterınarlyq baqylaýdy kúsheıtken sátten bastap, olardy ákelý jáne tranzıt kórsetkishiniń kúrt tómendegeni baıqalady.  Odan bólek, fıtosanıtarlyq baqylaýdyń kúsheıýimen baqylaý jáne belgileý pýnktterinde 692,6 tonna karantınge jatqyzylǵan ónimi bar 105 júk avtomashınasy tekserildi. Onyń 81-i (521,6 tonna ónim) shekarada, 24 avtomashına (172 tonna ónim) - belgileý pýnktinde tekserýden ótken, 11 zań buzýshylyq anyqtalǵan.

Zań buzýshylarǵa qatysty birqatar sharalar qoldanyldy: 10 fakt boıynsha -júk Qyrǵyzstanǵa keri qaıtaryldy jáne ondaǵy 2 fakt boıynsha aıyppul salyndy. Jalpy salmaǵy 44 tonna júk qaıtarylyp, 68 myń teńge aıyppul salynǵan.