QR Ákimshilik quqyq buzýshylyq týraly Kodekstiń jańa erejesinde 50-den artyq bap Qylmystyq Kodekske aýystyryldy
ASTANA. QazAqparat - Búgin Kóliktegi ІІD bastyǵy polıtsııa polkovnıgi Ahan Qajkenovtyń tóraǵalyǵymen 2015 jyldyń 1 qańtarynan bastap kúshine enetin QR Ákimshilik quqyq buzýshylyq týraly Kodeksiniń jańa erejeleri talqylandy.
Semınar-keńeske Bas kólik prokýratýrasy basqarmasynyń aǵa prokýrory Rýslan Platonov, QR Bas prokýratýrasynyń Quqyqtyq statıstıka jáne arnaıy esepke alý komıtetiniń aǵa prokýrory Arman Qaıyrov, QR ІІM Ákimshilik polıtsııa komıtetiniń Basqarma bastyǵy polıtsııa podpolkovnıgi Alekseı Mılıýk jáne departamenttiń jelilik bólinisteriniń basshylary qatysty, dep habarlaıdy Kóliktegi ІІD-niń baspasóz qyzmetinen.
«Biz Qazaqstan Respýblıkasynyń basqa da kodeksteri tárizdi qoldanysqa engiziletin jańa QR Ákimshilik quqyq buzýshylyq týraly Kodeksiniń normalaryn kúndelikti qyzmette qoldaný máselelerin talqylaý úshin jınaldyq. Jańa Ákimshilik Kodekste ózgerister kóp, bul qoǵamdaǵy quqyq buzýshylyqtyń aldyn-alýǵa septigin tıgizedi. Aldaǵy ýaqytta Kodeks erejelerindegi ózgeristerdi júzege asyryp, jańa zań talaptaryna saı qyzmet etýge daıyn bolýymyz kerek», - dedi polıtsııa polkovnıgi Ahan Sattybaıuly.
Jıyn barysynda Bas kólik prokýratýrasy basqarmasynyń aǵa prokýrory Rýslan Evgenevıch talqylanyp jatqan Ákimshilik Kodekstiń erejelerindegi ózgeristerge toqtalyp ótti. Máselen, jańa Ákimshilik Kodekste 60-tan astam memlekettik organdar ákimshilik óndiris materıaldary boıynsha sheshim qabyldaýǵa ýákiletti. Sondaı-aq 1700-den asa ákimshilik quqyq buzýshylyq quramy qarastyrylǵan. Onda qoldanystaǵy Kodeksten 50-den artyq bap QR Qylmystyq Kodeksine qylmystyq teris qylyqtar sanatyna aýystyrylǵan.
Kodeksterdiń qaıtadan ázirlengen nusqasynda qylmystar, oqıǵalar týraly ótinishterdi, habarlamalardy, shaǵymdardy jáne ózge de aqparatty, qylmystyq isterdi, olardy tergeý jáne prokýrorlyq qadaǵalaý nátıjelerin biryńǵaı, sonyń ishinde elektrondyq formatta kartochkalyq esepke alý kózdelgen. Keńeste osy máseleler jan-jaqty talqylandy.
Jıyn sońynda Kóliktegi ІІD bastyǵy polıtsııa polkovnıgi A. Qajkenov jelilik bólinisterdiń basshylaryna jergilikti jerlerde jeke quramnyń arasynda QR Ákimshilik quqyq buzýshylyq týraly Kodeksiniń jańa erejeleri boıynsha arnaıy túsindirme jumystaryn júrgizýdi tapsyrdy.
