QR AQDM jastar máselesine qatysty arnaıy otyrys ótkizdi

NUR-SULTAN. QazAqparat - 2021 jylǵy 12 tamyzda «Jastar» ǵylymı-zertteý ortalyǵy Halyqaralyq jastar kúnine oraı «Qazirgi jastar: problemalar, qajettilikter, úrdister» taqyrybynda «Jastar: ózekti másele» saraptama alańynyń kezekti otyrysyn ótkizdi.

Іs-shara QR Aqparat jáne qoǵamdyq damý mınıstrliginiń Jastar jáne otbasy isteri komıtetiniń qoldaýymen uıymdastyryldy, dep habarlaıdy QazAqparat.

Pikirtalasqa memlekettik organdardyń ókilderi, qoǵam qaıratkerleri, jas ǵalymdar, sarapshylar qatysty.

QR AQDM Jastar jáne otbasy isteri komıtetiniń tóraǵasy Sh.Baımanov jáne QR Parlamenti Májilisiniń depýtaty M. Ahmetov memleketimiz jastardyń aǵymdaǵy problemalaryn nazardan tys qaldyrmaıtynyn jáne olardy sheshý boıynsha sharalar qabyldap jatqanyn atap ótti.

Kezdesý barysynda «Jastar» ǴZO dırektory A.Sakoshev Memleket basshysyna jyl saıyn engiziletin «Qazaqstan jastary» ulttyq baıandamasynyń negizi bolatyn 2021 jyly júrgizilgen áleýmettik zertteýdiń nátıjelerin usyndy.

Sarapshylar mańyzdy máselelerdi kóterip, olardy sheshý úshin naqty usynystar berdi. Onyń ishinde, QR Parlamenti Senaty janyndaǵy Jas sarapshylar klýbynyń múshesi J.Ysqaqova jastardyń qundylyqtary týraly baıandama jasady, saıası keńesshi D. Aıkenova qazirgi jas urpaqtyń minez-qulqynyń zańdylyqtary týraly aıtty, «Jas Otan» tóraǵasynyń orynbasary A. Búrkitalın óz sózinde jastardy jumyspen qamtý máselelerin talqylady, al «Jas Ulan» RQB tóraıymy D.Sadýaqasova óz baıandamasyn jastar arasyndaǵy býllıng pen lýdomanııanyń ózekti máselelerine arnady.

«Jastar: ózekti másele» saraptama alańynyń kezekti otyrysynyń qorytyndysy boıynsha memlekettik organdar men ÚEU úshin memlekettik organdar, qoǵamdyq uıymdar ókilderi, sarapshylar jáne basqa da qatysýshylar jarııalaǵan usynymdar tizimi jasaldy.

Іs - shara barlyq sanıtarlyq normalardy saqtaı otyryp, onlaın jáne oflaın formatta ótti.