QR Ádilet mınıstrligi shetelge shyǵýǵa ýaqytsha shekteý qoıylǵan qazaqstandyqtardyń esimderin atady

Atalǵan vedomstvo baspasóz qyzmeti usynǵan aqparatqa sáıkes, «Oryndaýshylyq óndirisi jáne sot oryndaýshylarynyń mártebesi týraly» jańa zańnyń qoldanysqa engizilýine baılanysty sot  oryndaýshylary qaryz óteýge yqylasy joq boryshkerlerdi Qazaqstan Respýblıkasynan tysqary shyǵýǵa ýaqytsha shekteý qoıý sharasy arqyly májbúrleýge quqyly.

«Bul májbúrlep oryndatý sharasy barynsha tıimdi jáne ózin ózi aqtaıdy. Qazirgi ýaqytta uzaq ýaqyt boıy boryshkerlerdiń sot aktisiniń oryndamaı júrip, tysqary shyǵýǵa shekteý qoıylǵannan keıin bir kúnniń ishinde tolyq kólemde qaryzyn jabý faktileri bar. Máselen, Almaty oblysynda boryshker shetelge shyǵý úshin «Alıans bank» aldyndaǵy 1 mıllıon teńgeden astam qaryzyn tóleýge májbúr boldy», - dedi QR ÁM Sot aktilerin oryndaý komıteti tóraǵasynyń orynbasary Sanjar Toǵaev.

QR aýmaǵynan shyǵýǵa ýaqytsha shekteý qoıylǵan boryshkerlerdiń tizimi QR Ádilet mınıstrliginiń resmı saıtynda aǵymdaǵy jyldyń shilde aıynan beri ornalastyrylǵan ári kúnsaıyn jańartylyp otyrady.

Qazirgi ýaqytta 70 911 267 952  teńge qaryzy bar 17942 adamǵa el aýmaǵynan tysqary shyǵýǵa shekteý qoıylǵan.  2 189 276 994 teńge qaryzyn qaıtarǵan 1745 boryshkerden shekteý alynyp tastaldy.