QR Ádilet mınıstrligi dástúrli mádenı qundylyqtardy, onyń ishinde qymyz ben shubatty qorǵaý máselesine túsinikteme berdi
Atalǵan vedomstvo taratqan málimetke qaraǵanda, sońǵy ýaqytta Ádilet mınıstrliginiń atyna dástúrli mádenı qundylyqtardy, mysaly qymyz, shubat túrindegi dástúrli qazaq sýsyndaryn qorǵaý jáne osy másele quzyretine jatatyn ýákiletti organ týraly máselege túsinikteme berý týraly birneshe ótinish kelip túsken.
Osyǵan baılanysty kelesige nazar aýdarǵymyz keledi. Osy máseleni qaraý kezinde Qazaqstan Respýblıkasy Ádilet mınıstrliginiń jáne Qazaqstan Respýblıkasy Mádenıet jáne sport mınıstrliginiń quzyretin naqty ajyratý qajet.
«Ádilet mınıstrligi dástúrli bilimder men daǵdylardan aıryqshalanatyn qazirgi zamanǵy jaǵdaılarda ónerkásiptik óndiris tehnologııasyna patentterdi tirkeýge jáne berýge jaýap beredi. Mysaly, qymyzdy ónerkásiptik daıyndaý tásilderine 24 patent, shubatty ónerkásiptik daıyndaý tásilderine - 17 patent berildi», - delingen vedomstvo habarlamasynda.
Ónertabysqa patent berý úshin patent qabilettiligi, jańalyq jaǵdaılary tekseriledi. Dástúrli bilimderdiń (ónim nemese olardy shyǵarý tásili) eshqandaı nysany jańalyqqa tekserýden óte almaıdy.
Osylaısha, ónerkásiptik óndiris tehnologııasyna patentter berý olardyń quqyq ıelenýshilerine dástúrli ónimderge jáne sýsyndarǵa ózge de dástúrli buıymdarǵa quqyqtar bermeıdi.
Olardy paıdalaný jáne qorǵaý máselesi mádenıet salasyndaǵy zańnamamen retteledi.
Atap aıtqanda, «Mádenıet týraly» Zańnyń 7-babyna sáıkes Mádenıet jáne sport mınıstrliginiń quzyretine dástúrlerdi, salttardy, tilderdi jáne olarmen baılanysty bilimder men daǵdylardy qosa alǵanda, ulttyq materıaldyq emes mádenı murany qorǵaý jáne damytý máseleleri jatady.
