QR Ádilet mınıstrligi $17 mlrd-tan astam somaǵa memleket múddesin qorǵaǵan
Mınıstrdiń málimdeýinshe, sońǵy 13 jylda QR Ádilet mınıstrligi arbıtrajdy jáne sheteldik sottarda respýblıka múddelerin 17 mlrd 400 mln AQSh dollaryna qorǵaǵan.
«Byltyr London qalasynyń Joǵary Ádilet soty Qazaqstan Respýblıkasynyń paıdasyna 22 mlrd 600 mln teńge somasynda mońǵol kompanııasynyń talap aryzyn qanaǵattandyrmady. Túrkııa Respýblıkasynyń Joǵary soty da túrik azamatynyń 3 mlrd 300 mln teńge somasyndaǵy appelıatsııalyq shaǵymyn qanaǵattandyrǵan joq»,- dep atap ótti Marat Beketaev.
Sondaı-aq, mekeme derekterine sáıkes, bıylǵy naýryz aıynda London qalasynyń Joǵarǵy Ádilet soty «Rýbı Roz Agrıkol» JShS ótinishimen 2013 jyldyń 1 tamyzyndaǵy tórelik sheshimniń kúshin joıýǵa qatysty sot protsesinde Qazaqstan Respýblıkasynyń paıdasyna sheshim qabyldandy. Atalǵan arbıtrajdyq sheshimmen 214 mıllıon AQSh dollarynan asatyn talap aryz keri qaıtaryldy. 6 maýsym kúni Aǵylshyn soty elimizdiń paıdasyna 500 mln dollardan asatyn somaǵa sheshim shyǵardy. Sot QR Ádilet mınıstrliginiń Qazaqstanǵa qarsy arbıtrajdyq iste alaıaqtyq faktisi bolýy múmkin degen dálelderimen kelisken.
«Bul baǵyttaǵy jumystardyń basty aspektisi bolashaqta oryn alýy múmkin daýlardyń aldyn alý. Bizdiń qyzmetkerler jer qoınaýyn paıdalanýdyń, túrli áleýmettik mańyzy bar salalarda ınvestıtsııalyq kelisimder men sharttardy talqylaý boıynsha kelissózderge belsene qatysady», - dep túıindedi Marat Beketaev.
Arbıtraj daýdy sheshýdiń erekshe formasy. Taraptar daýdy sheshý týraly mámilege keledi nemese Táýelsiz sotqa júgine alady. Táýelsiz trıbýnal ádettegideı, halyqaralyq quqyq týraly tereń bilimi bar jáne arbıtrajdy protseste tájirıbesi mol 3 arbıtrden turady. Qazaqstan Táýelsizdiktiń alǵashqy jyldary arbıtraj daý-damaıdy sheshýdiń mindetti tásili retinde qarastyrylǵan Investıtsııalardy qorǵaý týraly kelisimge qol qoıǵan.
