QR Ádilet mınıstri B. Imashev tól merekeniń ataýyn ózgertýdi usyndy
ASTANA. 28 qyrkúıek. QazAqparat - Zańgerlerdi ortaq kásibı abyroı men tilektestik bolýy tıis. Bul týraly búgin Astanada Qazaqstan Respýblıkasy Ádilet organdary qyzmetkerleriniń kúnin merekeleýge arnalǵan saltanatty sharada QR Ádilet mınıstri Berik Imashev málim etti.
«Biz ózimizdiń kásibı tól merekemizdi alǵash atap ótýdemiz. Osy oraıda bizdiń eńbegimizdi Memleket basshysy men barsha bizdiń qoǵam tarapynan laıyqty baǵalanyp otyrǵanyn kórsetedi. Sonymen qatar osy kásibı merekeniń ataýyna ózgertý men tolyqtyrý boıynsha usynysqa bastama jasaý qajet dep sanaımyn. Ony ádilet organdary qyzmetkerleri men zańgerlerdiń kúni dep ataýǵa bolar edi», - dedi mınıstr.
«Biz ózimizdi notarıýsterden, advokattardan, kez-kelgen kásiporynnyń zańgerlerinen, zańgerlik turǵydaǵy salanyń ózge qyzmetkerlerinen bólip-jaryp turǵanymyz joq. Bizdi bir mamandyq biriktirip otyr, ol - zańgerlik mamandyǵy. Osy oraıda bizde ortaq kásibı abyroı men tilektestik bolýy tıis», - dedi vedomstvo basshysy.
Óziniń quttyqtaý sózinde Ádilet mınıstri Berik Imashev Ádilet mınıstrliginiń elimizdiń táýelsizdik alǵan kezinen beri memlekettiń quqyqtyq saıasatyn ázirleý jáne júzege asyrýǵa úlken septigin tıgizgenin atap ótti.
Búgingi tańda Ádilet mınıstrligi men onyń aýmaqtyq organdary ózderine júktelgen mańyzdy memlekettik qyzmetti júzege asyratyn qarymdy mehanızm.
Atalǵan vedomstvonyń málimetinshe, ádilet organdary qyzmetkerleriniń kúnin toılaý qarsańynda ádilet organdarynyń damýyna qosqan zor úlesi úshin Qazaqstan Respýblıkasy Ádilet mınıstriniń buıryǵymen 89 qyzmetker «Ádilet organdary júıesin damytýǵa qosqan úlesi úshin» medalimen, 74 - «Ádilet organdary júıesiniń qurmetti qyzmetkeri» tósbelgisimen, 66 - І, ІІ, ı ІІІ deńgeıli «Ádilet organdarynyń úzdigi» tósbelgisimen jáne 143 qyzmetker Qazaqstan Respýblıkasy Ádilet mınıstriniń gramotasymen marapattaldy.
