«QPO b.v.» kompanııasynyń BQO-nyń áleýmettik jobalaryna bóletin qarjysy molaıa túspek

Bul týraly oblys ákimi Altaı Kólginovtiń atalmysh «QPO b.v.» operatory, ıtalıandyq Eni kompanııasy basshylyǵymen kezdesýinde aıtyldy, dep habarlaıdy «QazAqparat» tilshisi.

BQO ákiminiń baspasóz qyzmetinen túsken málimetke qaraǵanda, Eni kompanııasy barlaý jáne óndirý jónindegi bas operatsııalyq dırektory Antonıo Vella men atqarýshy vıtse-prezıdenti Lýka Vınıatımen ótken basqosýda Qarashyǵanaq jobasyn júzege asyrýdyń 2017 jylǵy óndiristik nátıjeleri, sondaı-aq kenishtiń sanıtarlyq-qorǵaý aımaǵy shekarasynyń ózgertilýine baılanysty QR Úkimeti qaýlysyna sáıkes Bórli aýdanyndaǵy Berezov pen Bestaý aýyldary turǵyndaryn kóshirýdiń qorytyndylary týraly aıtyldy.

Investorlardyń sózine qaraǵanda, «QPO b.v.» ótken jyly ónim óndirýdiń rekordtyq kórsetkishine qol jetkizdi, bul Qazaqstan Respýblıkasy men seriktes kompanııalar úshin qosymsha tabys tabýǵa múmkindik berdi.

Taraptar sonymen qatar qazaqstandyq úlesti kóbeıtý, jobanyń keńeıtilýine baılanysty alda turǵan maqsat-mindetter jáne basqa máselelerdi talqylady. Mysaly, 2017 jyldyń qorytyndysyna sáıkes taýarlar, jumystar men qyzmetter kólemindegi jergilikti kásiporyndar qatysy 54 paıyzǵa ósip, 400 mln AQSh dollaryn quraǵany atap ótildi. Tutastaı alǵanda, ónimdi bólisý jónindegi túpkilikti kelisimge qol qoıylǵan 1997 jyldan beri «QPO b.v.» satypalýlaryndaǵy jergilikti úles 6,5 mlrd AQSh dollaryna jetken.

BQO ákimdiginiń ótinishine sáıkes Qarashyǵanaq aktsıonerleri bıyldan bastap óńirdiń áleýmettik ınfraqurylymyn damytýǵa quıatyn jyl saıynǵy ınvestıtsııalaryn ulǵaıtpaqshy. Eni kompanııasy ókilderiniń aıtýynsha, jıyrma jylda bul maqsatqa 340 mln astam AQSh dollary bólingen.

BQO ákimi Altaı Kólginov Qarashyǵanaq jobasyn odan ári júzege asyrý aıasynda oblystyń atqarýshy organdary tarapynan qajetti qoldaý kórsetiletinin jetkizdi.

«Qarashyǵanaqtyń óńir ekonomıkasyndaǵy mańyzy zor: tek jobanyń ózinde 4 myń qazaqstandyq qyzmetker jumys jasaıdy, odan bólek kenishti ıgerýge kóptegen otandyq merdigerler men ónim jetkizýshiler qatysýda. Bul rette Qazaqstannyń strategııalyq múddelerin qamtamasyz etý jáne qorshaǵan ortany qorǵaý men ónerkásiptik qaýipsizdik salasyndaǵy zańdylyqty múltiksiz saqtaý basym baǵyt bolyp qala bermek», dedi óńir basshysy.