QPL: «Jetisý» óz alańynda «Qaısardan» basym tústi
ASTANA. KAZINFORM — Fýtboldan Qazaqstan Premer-lıgasynyń keıinge qaldyrylǵan HHІІІ týrynda «Jetisý» (Taldyqorǵan) — «Qaısar» (Qyzylorda) kezdesýiniń nátıjesi belgili boldy.
Eki komanda týrnır kestesinde tómengi oryndarda keledi. Olardyń aldynda Premer-lıgadaǵy ornyn saqtap qalý mindeti turǵan edi.
Kezdesý barysynda qyzylordalyq komanda jyldam gol soǵyp úlgerdi. Oıynnyń 11-mınýtynda olardyń qatarynan Vıktor Mozes mergendik tanytty.
Odan keıin taldyqorǵandyq klýbtyń belsendiligi baıqaldy. Alań ıeleri sapynan Shoqan Abzalov 71-mınýtta tarazy basyn teńestirse, Nurbol Nurbergen 76-mınýtta qorytyndy esepti belgiledi.
Osylaısha, «Jetisý» qarsylasynan 2:1 esebimen jeńip, týrnır kestesinde jaǵdaıyn jaqsarta tústi.
Dál qazir «Tobyl» (Qostanaı) — «Jeńis» (Astana) kezdesýi ótip jatyr.
Al 19:00–de «Aqtóbe» — «Ordabasy» (Shymkent) jasyl alańǵa shyǵady.
Aıta ketsek, budan buryn «Oqjetpes» «Qyzyljardy» jeńip, tórtinshi orynǵa kóterildi.
Sondaı-aq 18 qazanda 15:00–de «Altaı» (Óskemen) — «Atyraý», 16:00–de «Elimaı» (Semeı) — «Ulytaý» (Jezqazǵan), 18:00-de «Qaırat» (Almaty) — «Ertis» (Pavlodar), 19:00–de «Astana» — «Kaspıı» (Aqtaý) sheberlik baıqasady.
