QPL: «Jetisý» úzdikterge jaqyndaı tústi
NUR-SULTAN. QazAqparat - Búgin fýtboldan Premer-lıga komandalary arasyndaǵy Qazaqstan birinshiliginiń 30-týrynyń eki oıyny ótkizildi, dep habarlaıdy QazAqparat tilshisi.
Pavlodarda jergilikti «Ertis» Qyzylordanyń «Qaısar» komandasyn qabyldady. Alań ıeleri atalmysh kezdesýde jeńiske jetti. Esep 37-mınýtta ashyldy. Sol sátte «Qaısardyń» qorǵaýshysy Aleksandr Marochkın óz aıyp alańynda pavlodarlyq oıynshy Rýslan Mıngazovty shalyp shyqty. Bas tóreshi A.Marochkınge qyzyl qaǵaz kórsetip, ony alańnan qýdy. «Qaısardyń» qaqpasyna belgilengen penaltıdi pavlodarlyq oıynshy Jeremı Manzoro múlt jibergen joq. Ekinshi kezeńniń 51-mınýtynda «Ertis» fýtbolshysy Rýslan Esimov esepti ulǵaıta tústi. Al 56-mınýtta buryshtamadan áýelete bergen goldy qaısarlyq Abdel Azız Lamanj baspen qaqpaǵa soǵyp ketti. Al 80-mınýtta «Qaısardyń» sapynan Ivan Sadovnıchıı alańnan qýylyp, qyzylordalyqtar oıyndy toǵyz fýtboshymen aıaqtaýǵa májbúr boldy. Osylaısha «Ertis» qarsylasynan 2:1 esebimen jeńiske jetti.
«Atyraý» segiz oıynnan beri jeńiske jete almaı keeldi. Jaqynda komandaǵa jańa bapker taǵaıyndaldy. Bul qyzmetke belgili qazaqstandyq maman Asqar Qojabergenov keldi. Degenmen olar búgin de súreńsiz oıyn kórsetti. Bul joly óz alańynda Taldyqorǵannyń «Jetisý» komandasynan 0:3 esebimen jeńildi. «Jetisý» sapynan Martın Toshev 11, 37-mınýtta Rýslan Stepanıýk, Nenad Adamovıch 40-mınýtta mergendik tanytty.
Atalmysh týrdaǵy qalǵan oıyndar 20 qazanda ótkiziledi. Bul kúni «Tobyl» men «Ordabasy», «Taraz» ben «Shahter», «Aqtóbe» men «Oqjetpes», «Astana» men «Qaırat» komandalary kezdesedi.
