QPL: «Jetisý» bes oıynnan keıin jeńiske jetti
NUR-SULTAN. QazAqparat - Búgin fýtboldan elimizdiń Premer-lıga komandalary arasyndaǵy birinshiliginiń 18-týryndaǵy eki oıyn ótkizildi, dep habarlaıdy QazAqparat tilshisi.
Alǵashqy oıyn Taldyqorǵan qalasynda boldy. Jergilikti «Jetisý» óz alańynda Pavlodardyń «Ertisin» qabyldady. Bul kezdesýde alań ıeleri óz jankúıerlerin qýantty. Birinshi kezeńniń 28-mınýtynda Oljas Kerimjanov «Jetisýdy» alǵa shyǵarsa, 45-mınýtta Nenad Adamovıch taǵy bir gol soǵyp ketti. Ekinshi kezeń bastala salysymen alań ıeleri qatarynan Eljas Altynbekov esepti ulǵaıtty. Al 75-mınýtta «Ertis» sapynan Rafhat Aslan óz qaqpasyna gol soǵyp aldy. Kezdesýde «Jetisý» 4:0 esebimen jeńiske jetti. Taldyqorǵandyq klýb bes oıyn boıy jeńiske jete almaı kelgen edi.
«Aqtóbe» komandasy taǵy bir márte jaqsy oıyn órnegin kórsetti. Atalmysh klýb búgin óz alańynda Qaraǵandynyń «Shahter» komandasymen kezdesken edi. Alań ıeleri birinshi kezeńde óz qaqpasyna eki gol jiberip aldy. Eki goldy «Shahter» sapynan Sergeı Zenev 30, Ivan Peshıch 38-mınýtta soqqan edi. Oǵan «Aqtóbe» ekinshi kezeńde qos golmen jaýap qaıyrdy. Aldymen 65-mınýtta Aslanbek Kákimov penaltıden esep aıyrmasyn qysqartsa, 70-mınýtta Abat Aıymbetov tarazy basyn teńestirdi. Oıyn 2:2 esebimen teń aıaqtaldy.
Bul týrdaǵy bir oıyn «Astana» men «Atyraý» arasynda 3 sáýir kúni ótkizilgen edi. Ol kezdesýde elordalyq klýb 3:1 esebimen jeńiske jetti.
Endi qalǵan úsh oıyn 14 shildede kúni bolady. Onda «Oqjetpes» pen «Taraz», «Ordabasy» men «Tobyl», «Qaırat» pen «Qaısar» komandalary sheberlik baıqasady.
