QPL: «Jeńis» bıyl alǵash ret jeńiske jetti

ASTANA. KAZINFORM - Búgin fýtboldan Premer-lıga komandalary arasyndaǵy el birinshiliginiń 12-týrynda elordalyq «Jeńis» alǵashqy jeńisine jetti.

Astanalyq komanda bıyl on bir týr boıy úsh upaıǵa qol jetkize alǵan joq. Esesine jeti márte teń túsip, tórteýinde qarsylasyna ese jiberdi. Sondyqtan olar Túrkistanda «Turanmen» kezdesýde jeńiske jetýge bar kúshin salatyny belgili edi.

Túrkistandyq klýbtan qarjy máselesine baılanysty bapkerler quramy men sheteldik oıynshylar ketip qaldy. Sol sebepti atalǵan komanda búgin negizinen jergilikti jastarǵa senim artýǵa májbúr boldy.

Kezdesý barysynda elordalyq fýtbolshylar basym oınady. Dese de birinshi kezeńde esep asha alǵan joq. 

Ekinshi kezeńde alań ıeleri eki qatelikke boı aldyrdy. Ony «Jeńis» komandasy tıimdi paıdalanyp ketti. Bul goldardy Ardaq Sáýlet 74, Adılıo 84-mınýtta óziniń enshisine jazdy.
Osylaısha elordalyq komanda qarsylasynan 2:0 esebimen basym tústi.

Sondaı-aq 14 maýsymda «Jetisý» (Taldyqorǵan) men «Qaırat» (Almaty) 2:2,« Qyzyljar» (Petropavl) men «Aqtóbe» 0:0 esebine qanaǵat bildirse, «Atyraý» óz alańynda jezqazǵandyq «Ulytaýǵa» 0:1 esebimen ese jiberdi.

Atalǵan týrda 15 maýsymda 18:00-de «Astana» men «Oqjetpes» (Kókshetaý), 20:00-de «Ordabasy» (Shymkent) men «Elimaı» (Semeı), «Qaısar» (Qyzylorda) men «Tobyl» (Qostanaı) oınaıdy.