QPL: «Turan» qatarynan segizinshi márte jeńilip qaldy

ASTANA. KAZINFORM — Fýtboldan Premer-lıga komandalary arasyndaǵy el birinshiliginiń 16-týryndaǵy alǵashqy oıyn kúni máresine jetti.

Bul kúnge belgilengen ekinshi kezdesýde túrkistandyq «Turan» óz alańynda Petropavldyń «Qyzyljaryn» qabyldady. 

Túrkistandyq komanda birinshi aınalymnan keıin sheteldik oıynshylardan bas tartty. Qazir negizinen qazaqstandyq fýtbolshylarǵa senim artyp otyr. Komanda quramyna jańadan oıynshylar qosyldy. Sondyqtan olar úshin ázirge jeńiske jetý múmkindik bolmaı tur.
Kezdesý barysynda petropavldyq komanda tizgindi óz qolynda ustaýǵa tyrysty. Soǵan qaramastan «Turan» alǵashqy bolyp esep ashty. Bul goldy Asyljan Abbas 11-mınýtta óziniń enshisine jazdy.

Ekinshi kezeńde petropavldyq klýbtan Anatolıı Kozlenko 68-mınýtta tarazy basyn teńestirse, Toqtar Jańǵylyshbaı 86-mınýtta penaltıden múlt ketken joq.

Osylaısha «Turan» qarsylasyna 1:2 esebimen ese jiberip, qatarynan segizinshi márte jeńilistiń aşy dámin tatty. 

Aıta ketsek, budan buryn búgin jezqazǵandyq «Ulytaý» men Semeıdiń «Elimaıy» 1:1 esebine qanaǵat bildirdi.

Endi 13 shildede «Jeńis» (Astana) pen «Jetisý» (Taldyqorǵan), «Tobyl» (Qostanaı) men «Oqjetpes» (Kókshetaý), «Ordabasy» (Shymkent) men «Astana» oınaıdy.

Bul týrdaǵy aldyn ala ótkizilgen oıyndarda 16 sáýirde almatylyq «Qaırat» «Atyraýdy» 4:0 esebimen jeńse, 14 mamyrda qyzylordalyq «Qaısar» «Aqtóbege» 1:2 esebimen ese jiberdi.