QPL: «Tobyl» «Jetisýmen» teń tústi
NUR-SULTAN. QazAqparat - Búgin fýtboldan Premer-lıga komandalary arasyndaǵy el birinshiligi 28-týrynyń eki oıyny ótkizildi, dep habarlaıdy QazAqparat tilshisi.
Alǵashqy kezdesý Pavlodar qalasynda ótti. Jergilikti «Ertis» Qaraǵandynyń «Shahter» komandasymen sheberlik baıqasty. Oıyn qaraǵandylyq fýtbolshylar úshin sátti bastalǵan edi. Birinshi kezeńniń 15 jáne 36-mınýttarynda «Shahter» shabýylshysy Kızıto Lývaga eki goldyń avtory atandy.
Ekinshi kezeńde alań ıeleri jınaqy oıyn kórsetti. Nátıjesinde qarsylastar qaqpasyna tórt gol soqty. Oıynnyń 66-mınýtynda Deıan Georgıevıch esep aıyrmasyn qysqartsa, 68-mınýtta Jeremı Manzorro tarazy basyn teńestirdi. Al 89-mınýtta Jeremı Manzorro komandasyn alǵa shyǵarsa, 90-mınýtta Rýslan Mıngazov qorytyndy esepti belgiledi. Osylaısha «Ertis» 4:2 esebimen jeńiske jetti.
Taǵy bir kezdesý Qostanaı qalasynda bolyp ótti. Týrnır kestesinde kósh basynda kele jatqan jergilikti «Tobyl» búgin Taldyqorǵannyń «Jetisý» komandasymen sheberlik baıqasty. Qostanaılyq klýb jeti oıyn qatarynan jeńilip kórgen joq. Onyń altaýynda qarsylastarynan basym túsip, tek bireýinde ǵana teń nátıjege qanaǵat bildirdi. «Tobyl» bıyl bas júldeden úmitker komandanyń biri sanalady. Sondyqtan búgin olar tek jeńis úshin oınaıtyny belgili bolatyn. Degenmen olarǵa taldyqorǵandyq fýtbolshylar laıyqty qarsylyq kórsetti. Kezdesý 0:0 esebimen teń aıaqtaldy.
Atalmysh týrdaǵy qalǵan oıyndar 29 qyrkúıek kúni ótkiziledi. Bul kúni «Astana» men «Qaısar», «Qaırat» pen «Ordabasy», «Atyraý» men «Oqjetpes», «Aqtóbe» men «Taraz» komandalary oınaıdy.
Al 29-týr oıyndary 5, 6 jáne 30 qazan kúnderi ótkiziledi. Aldymen 5 qazanda «Oqjetpes» pen «Taraz», «Qaırat» jáne «Aqtóbe», «Jetisý» men «Ertis», 6 qazanda «Ordabasy» men «Astana» komandalary kezdesedi. Bul týrdaǵy «Qaısar» men «Tobyl», «Shahter» men «Atyraý» arasyndaǵy kezdesý 30 qazanǵa aýystyryldy. Óıtkeni, 6 qazan kúni Qazaqstan kýbogynyń fınalynda «Qaısar» men «Atyraý» komandalary sheberlik baıqasady.
