QPL: «Tobyl» úzdik úshtikke iligý múmkindigin qıyndatyp aldy
Budan buryn 25-týrdaǵy «Oqjetpes» pen «Astana» arasyndaǵy kezdesýde elordalyqtar 1:0 esebimen jeńiske jetti . Nátıjesinde 66 upaı jınaǵan olar týrnır kestesinde kósh basyna shyqty. «Astana» ózderinen bir upaı kem jınaǵan basty qarsylasy - Almatynyń «Qaıratyn» artqa tastady. Aldaǵy eki oıyn qaı komandanyń chempıon bolatynyn sheshedi.
Al 28-týrdaǵy bir oıynda Qyzylorda qalasynda jergilikti «Qaısar» men Qostanaıdyń «Tobyl» komandalary sheberlik baıqasty. Bul kezdesýde jeńiske jetý alań ıelerinen góri «Tobyl» aýadaı qajet edi. Dese de oıyn qostanaılyq klýb oılaǵandaı órbı qoıǵan joq. Kezdesýdiń 40-mınýtynda «Qaısardyń» kapıtany Ashat Taǵybergen qarsylastar qaqpasyn dál kózdep, óz komandasyn alǵa shyǵardy.
Ekinshi kezeńde eki komanda da alma-kezek shabýylǵa shyqty. Soǵan qaramastan oıyn sońyna deıin tablodaǵy esep ózgergen joq. Kezdesýdiń 93-mınýtynda tóreshi «Qaısardyń» fýtbolshysy óz aıyp alańynda qarsylasyn shalyp jyqty degen sheshim qabyldady. Nátıjesinde alań ıeleri qaqpasyna penaltı belgiledi. Ony «Tobyldyń» kapıtany Azat Nurǵalıev múlt jibergen joq. Oıyn 1:1 esebimen teń aıaqtaldy.
Aıta keterligi, «Tobyl» komandasy júldeli orynnyń birine iligýge kúsh salýda. Olar úshinshi oryn úshin Shymkenttiń «Ordabasy» komandasymen tartys júrgizip keledi. Endi eki klýbtyń da ótkizgen oıyny men jınaǵan upaıy teńesti. Qaısysynyń júldeger atanýy alday eki týr barysynda óz sheshimin tabatyn bolady.
Bul týrdaǵy taǵy bir kezdesý elordada Qaraǵandynyń «Shahteri» men «Atyraý» komandalary arasynda ótkizildi. Bul kezdesýde «Atyraý» sapynan Petr Gjelchak 20-mınýtta gol soqty. Oıynda «Atyraý» 1:0 esebimen jeńiske jetti. Endi olardyń 10-oryndaǵy «Tarazben» jınaǵan upaıy birdeı. Ekeýinde de 26 upaıdan bar. Erejege sáıkes sońǵy eki oryn alǵan komandalar birinshi lıgaǵa birden túsip qalady. Al 10- orynǵa turaqtaǵan komanda birinshi lıgada úshinshi oryndaǵy klýbpen Premer-lıgadaǵy taǵy bir oryn úshin tartysqa túsedi. Ol atalmysh eki komandanyń biriniń úzdikter qatarynda qalý múmkindigin arttyra túsedi.
Endi 32-týr oıyndary 3 qarasha kúni ótkiziledi. Bul kúni «Atyraý» men «Ordabasy», «Aqtóbe» men «Shahter», «Tobyl» men «Astana», «Taraz» ben «Qaısar», «Oqjetpes» pen «Jetisý», «Ertis» pen «Qaırat» komandalary kezdesedi.