QPL: «Tobyl» komandasy kósh basyna shyqty
NUR-SULTAN. QazAqparat - Búgin fýtboldan Premer-lıga komandalary arasyndaǵy Qazaqstan birinshiliginiń 16-týr oıyndary ótip jatyr. Dál qazir eki oıyn máresine jetti, dep habarlaıdy QazAqparat tilshisi.
Kókshetaýda jergilikti «Oqjetpes» komandasy «Atyraý» komandasymen kezdesti. Bul oıynda alań ıeleri basym oınady. Birinshi kezeń aıaqtalar tusta Tańat Nóserbaev penaltıden esep ashty. Al 62-mınýtta Danılo Alves esepti ulǵaıtsa, alań ıeleri qatarynan 86-mınýtta Sanat Jumahanov qorytyndy esepti belgiledi. Osylaısha «Oqjetpes» atalmysh qarsylasyn 3:0 esebimen tize búktirdi.
Taldyqorǵanda «Jetisý» Qostanaıdyń «Tobylymen» sheberlik baıqasty. Bul kezdesýde qostanaılyq klýb alǵashqy bolyp esep ashty. Ony Fernander Kassaı 32-mınýtta oryndady. Kezdesýde qostanaılyqtar 1:0 esebimen jeńiske jetti. «Tobyl» bdan keıin jeke-dara kósh basyna shyqty.
Dál qazir Shymkentte jergilikti «Ordabasy» men Qyzylordanyń «Qaısar» klýbtary arasyndaǵy kezdesýdiń birinshi kezeńi aıaqtaldy. Oıynnyń 37-mınýtynda Kýle Mvomba esep ashsa, 40 mınýtta shymkenttik Toqtar Jańǵylyshbaı tarazy basyn teńestirdi. Esep ázirge 1:1.
Sondaı-aq, Qaraǵandyda «Shahter» klýby men «Taraz» arasyndaǵy kezdesýdiń de birinshi kezeńi aıaqtaldy. Bul kezdesýde alań ıeleri sapynan Oralhan Ómirtaev 15-mınýtta esep ashty. Birinshi kezeńnen keıin osy esep saqtalyp tur.
Búgin taǵy eki kezdesý ótkiziledi. Atalmysh týrdy «Aqtóbe» men «Ertis», «Astana» men «Qaırat» komandalary túıindeıdi. Bul kezdesýler Nur-Sultan ýaqytymen 19.00-de bastaldy.
Al 17-týr oıyndary 5 jáne 6 shilde kúnderi kúnderi ótkiziledi. 5 shildede «Tobyl» men «Astana», «Qaırat» pen «Ordabasy», 6 shildede «Taraz» ben «Aqtóbe», «Qaısar» men «Shahter», «Ertis» pen «Oqjetpes», «Atyraý» men «Jetisý» komandalary kezdesedi.
