QPL: «Tobyl» qatarynan besinshi jeńisine jetti
NUR-SULTAN. QazAqparat - Búgin elimizdiń alty qalasynda fýtboldan Premer-lıga komandalary arasyndaǵy el birinshiliginiń besinshi týr oıyndary ótip jatyr. Dál qazirge deıin úsh match aıaqtaldy, dep habarlaıdy QazAqparat tilshisi.
«Aqtóbe» komandasy bıylǵy dop dodasyndaǵy alǵashqy upaıyna «Atyraýmen» kezdesýinde qol jetkizdi. Esterińizge sala ketelik, aqtóbelik klýb chempıonatty óte sátsiz bastady. Buǵan deıin tórt kezdesýde qarsylastaryna ese jiberdi. Sondaı-aq, olardan 12 upaı shegerilgen. Al olardyń óz qalasyndaǵy stadıony daıyn emes. Sol sebepti qarsylastaryn Qostanaı qalasynda qabyldaýǵa májbúr bolyp keledi. Búgingi kezdesýde «Aqtóbe» sapynan 3-mınýtta Mılan Radın, 44-mınýtta Hrvoe Mılıshevıch gol soqty. Osylaısha «Aqtóbe» 2:0 esebimen jeńiske jetti. «Atyraý» tórtinshi jeńilisine ushyrady.
Kókshetaý qalasynda jergilikti «Oqjetpes» Qostanaıdyń «Tobyl» komandasymen kezdesti. Aıta keterligi, «Oqjetpes» búginge deıin nebári bir upaıdy oljalasa, «Tobyl» birde-bir upaıdy shashaý shyǵarǵan joq. Esepti qostanaılyqtar ashty. Bul goldy 42-mınýtta Nıka Kvekveskırı soqty. Al 56-mınýtta qostanaılyq Maksım Fedın esepti ústemeleı tústi. Al 90-mınýtta «Oqjetpes» sapynan Tańat Nóserbaev esep aıyrmasyn qysqartty. «Tobyl» 2:1 esebimen basym túsip, dop dodasynda qatarynan besinshi jeńisine qol jetkizdi.
Qaraǵandy qalasynda jankúıer kútpegen esep tirkeldi. Buǵan deıin nebári bir márte teń túsken jergilikti «Shahter» Pavlodardyń «Ertisin» oısyrata jeńdi. Birinshi kezeńde qaraǵandylyq klýb úsh gol soǵyp úlgerdi. Atap aıtqanda, 2-mınýtta Ivan Peshıch esep ashsa, 8-mınýtta «Ertis» qatarynan Stanıslav Lýnın óz qaqpasyna gol soǵyp aldy. Al 19-mınýtta Ivan Peshıch pavlodarlyq klýb qaqpasyna belgilengen penaltıdi múlt jibergen joq. Ekinshi kezeńniń «Shahter» sapynan Evgenıı Tkachýk mergendik tanytty. «Shahter» «Ertisti» 4:0 esebimen tize búktirdi.
Dál qazir taǵy da eki match ótip jatyr. Birinshi kezeńnen keıin «Taraz» ben «Qaısar» 1:1 esebimen teń oınap jatsa, Taldyqorǵanda «Jetisý» Almatynyń «Qaıratynan» 1:0 esebimen basym túsýde. Al «Astana» men «Ordabasy» komandalary arasyndaǵy kezdesý elorda ýaqytymen 18.00-de bastalady.
