QPL: «Tobyl» úshinshi márte jeńiliske ushyrady

ASTANA. KAZINFORM - Qazaqstan Premer-lıgasynda tórtinshi týryndaǵy eki oıynnyń nátıjesi belgili boldy.

Bul týrdaǵy oıyndar 4 jáne 5 sáýir kúnderine belgilengen. Búgin, 4 sáýirde tórt kezdesý ótkizilse, 5 sáýirde tórt oıyn bolady.

Aldymen «Ertis» (Pavlodar) men «Altaı» (Óskemen) komandalary jasyl alańǵa shyqty. Ótken jyly birinshi lıgada top jaryp, bıyl Premer-lıgada synǵa túsýge múmkindik alǵan komandalar alǵashqy mınýttan shabýylǵa shyqty. Dese de kezdesý taǵdyryn sheshken jalǵyz goldy pavlodarlyq klýbtan ıÝshı Shımamýra 36-mınýtta óziniń enshisine jazdy.

Osylaısha «Ertis» qarsylasynan 1:0 esebimen basym tústi.

Sondaı-aq qazir «Elimaı» (Semeı) men «Tobyl» (Qostanaı) kezdesýiniń nátıjesi belgili boldy. Qos komanda aldaǵy maýsymda úzdikter qatarynan kórinýdi qalaıdy. Sondyqtan olar alǵashqy mınýttan alǵa qaraı umtyldy. Oıynnyń 75-mınýtynda semeılik klýbtan Roman Murtazaev soqqan gol kezdesý taǵdyryn sheshti.

Bul oıynda «Elimaı» qarsylasynan 1:0 esebimen basym tústi.

Alǵashqy oıyn kúninde «Qaısar» (Qyzylorda) men «Qyzyljar» (Petropavl) 0:0 esebine qanaǵat bildirse, «Ordabasy» (Shymkent) men «Atyraý» 1:1 esebin tirkedi.

Erteń, 5 sáýirde tórtinshi týrdyń oıyndary jalǵasady. Aldymen 15:00-de «Ulytaý» (Jezqazǵan) - «Aqtóbe», «Kaspıı» (Aqtaý) - «Jetisý» (Taldyqorǵan), 18:00-de «Qaırat» (Almaty) - «Astana», 19:00-de «Jeńis» (Astana) - «Oqjetpes» (Kókshetaý) kezdesedi.

Úshinshi týrdan keıin alǵashqy tórt oryndaǵy «Astana», «Ordabasy», «Oqjetpes», «Qaırat», komandalarynyń jeti upaıy bar.

Eske salsaq, budan buryn fýtboldan Birinshi lıga komandalary arasyndaǵy Qazaqstan chempıonatynyń birinshi týry máresine jetti.