QPL: Sońǵy týrda alań ıeleriniń barlyǵy jeńildi
NUR-SULTAN. QazAqparat - Búgin fýtboldan Premer-lıga komandalary arasyndaǵy el birinshiliginiń 22-týrynyń tórt oıyny ótkizildi, dep habarlaıdy QazAqparat tilshisi.
Keshe atalmysh týrdaǵy eki oıynnyń nátıjesin habarlaǵan edik. Syrt alańda Qyzylordanyń «Qaısary» «Atyraýdy» 3:1, Taldyqorǵannyń «Jetisýy» Kókshetaýdyń «Oqjetpesin» 1:0 esebimen jeńdi.
Búgin «Taraz» óz alańynda Almatynyń «Qaıratyn» qabyldady. Kezdesý taǵdyryn jalǵyz gol sheshti. Ony 83-mınýtta Baýyrjan Islamhan soqty.
Pavlodardyń «Ertis» komandasy bul joly da jeńilip qaldy. Olar óz alańynda Qostanaıdyń «Tobylyna» 0:2 esebimen ese jiberdi. Goldar 59-mınýtta Baýyrjan Turysbektiń, 75-mınýtta Maksım Fedınniń enshisine jazyldy.
Qaraǵandynyń «Shahteri» men Shymkenttiń «Ordabasy» komandalary arasyndaǵy kezdesýde shymkenttikter 2:1 esebimen jeńiske jetti. «Ordabasy» sapynan Alekseı Şetkın 30-mınýtta, Mırzad Mehanovıch 51-mınýtta qanjyǵasyn maılasa, alań ıeleri qatarynan Erkebulan Nurǵalıev 59-mınýtta jalǵyz golmen jaýap qaıyrdy.
Bul týr Aqtóbe qalasyndaǵy «Aqtóbe» jáne elordalyq «Astana» komandalarynyń oıynymen túıindeldi. «Astana» sapynan Ivan Maevskıı 8-mınýtta, Rýnar Sıgýronsson 53-mınýtta gol soqqan edi. Odan keıin «Aqtóbe» shabýylshysy Abat Aıymbetov 56 jáne 83-mınýttarda qos goldyń avtory atandy. Osylaısha, oıyn sońyna taman tarazy basy teńesken edi. «Astana» oıynshysy Roman Mýrtazaev kezdesý taǵdyryn sheshken goldy 86-mınýtta soǵyp ketti. Nátıjesinde, «Astana» 3:2 esebimen jeńiske jetti.
Búgingi týrdan keıin el birinshiliginde ekinshi aınalym máresine jetti. Atap óterligi, sońǵy týrda alań ıeleriniń barlyǵy jeńilip qaldy.
Dop dodasyndaǵy jeńimpazdar úshinshi aınalym nátıjesi boıynsha anyqtalady. Úshinshi aınalymnyń oıyn tizbesi jaqyn kúnderi anyqtalady.
