QPL: «Shahter» óz alańynda «Tobyldy» jeńdi

ASTANA. KAZINFORM - Fýtboldan Qazaqstan Premer-lıgasynyń IX týry aıasynda qaraǵandylyq «Shahter» óz alańynda Qostanaıdyń «Tobylmen». kezdesti. 

Týrnır kestesinde kósh sońynda kele jatqan qaraǵandylyq komanda oıyn bastala sala shabýylǵa ıek artty. Óz múmkindigin múlt jibermeýge tyrysyp, alǵashqy goldy soǵýdyń amalyn izdedi. Kezdesýdiń 38-mınýtynda Rodjer Kanıas kózdegen nysanadan múlt ketken joq. Oıynnyń ekinshi bóliginde gol soǵylmady. Osylaısha qarsylasynan 1:0 esebimen basym túsken komanda týrnır kestesinde on ekinshi orynǵa kóterildi. 

Al, sońǵy bes kezdesýde úsh márte jeńiske jetken Taldyqorǵannyń «Jetisýy» óz alańynda Petropavldyń «Qyzyljar» komandasymen teń tústi. Match boıy komandalar bir-birine gol soǵa almady. Oıyn barysynda taldyqorǵandyq klýbtan Braga Vıktor Krıstıano 75, Tsotne Mosıashvılı 83-mınýtta qyzyl qaǵaz alyp, alańnan qýyldy. «Qyzyljar» sapynan Evgenıı Berezkın 84-mınýtta penaltıden múlt ketti.

Endi atalǵan týrdy 21.00-de «Elimaı» (Semeı) men «Qaırat» (Almaty) komandalary túıindeıdi. 

Eske salsaq, 18 mamyrda «Aqtóbe» men «Ordabasy» 0:0 esebine qanaǵat bildirse, «Atyraý» men «Astanany», «Qaısar» «Jeńisti» 1:0 esebimen tize búktirdi.