QPL: «Ordabasynyń» chempıon atanýyna múmkindigi arta tústi
ASTANA. KAZINFORM — Fýtboldan Qazaqstan Premer-lıgasynyń keıinge qaldyrylǵan HHІІІ týrynyń alǵashqy oıyn kúni máresine jetti.
Bul kúngi matchtardy «Aqtóbe» — «Ordabasy» (Shymkent) kezdesýi túıindedi.
Dop dodasy aıaqtalar tusta qos komanda óz maqsatyna jetýge bar kúshin salyp keledi. Aqtóbelik ujym tórtinshi orynǵa taban tirep, eýrododa aımaǵyna ornalasýdy kózdeıdi.
Al shymkenttik komanda bas júldege qol jetkizýdi qalaıdy.
Kezdesý barysynda komandalar tartysty oıyn ótkizdi. Aldymen «Aqtóbe» sapynan Danıel Sosa 21-mınýtta esep ashqan edi. Oǵan «Ordabasy» sapynan Leo Natel 21, Sergeı Malyı 53, Tıdıan Keıta 77-mınýtta úsh golmen jaýap berdi.
Osylaısha «Ordabasy» qarsylasynan 3:1 esebimen basym túsip, bas júldege bir taban jaqyndady. Nátıjesinde chempıon atanýyna múmkindigi arta tústi.
Aıta ketsek, budan buryn óz alańynda qostanaılyq «Tobyl» Astananyń «Jeńisin» 4:2, kókshetaýlyq «Oqjetpes» Petropavldyń «Qyzyljaryn» 1:0, taldyqorǵandyq «Jetisý» Qyzylordanyń «Qaısaryn» 2:1 esebimen jeńdi.
Endi erteń, 18 qazanda 15:00–de «Altaı» (Óskemen) — «Atyraý», 16:00–de «Elimaı» (Semeı) — «Ulytaý» (Jezqazǵan),
18:00-de «Qaırat» (Almaty) — «Ertis» (Pavlodar), 19:00–de «Astana» — «Kaspıı» (Aqtaý) sheberlik baıqasady.
