QPL: «Ordabasy» óz alańynda «Jeńispen» teń tústi
ASTANA. KAZINFORM - Búgin fýtboldan Qazaqstan Premer-lıgasynyń HHІV týrynyń alǵashqy oıyn kúni máresine jetti.
Bul kúngi matchtardy «Ordabasy» (Shymkent) — «Jeńis» (Astana) kezdesýi túıindedi.
Kezdesý barysynda jeńiske jetken jaǵdaıda shymkenttik komanda bir týr buryn chempıondyq ataqqa qol jetkizetin edi. Degenmen astanalyq klýb oǵan múmkindik bergen joq.
Alǵashqy kezeńde komandalar bir-biriniń qaqpasynan sańylaý taba alǵan joq. Ekinshi kezeńde 46-mınýtta «Ordabasy» qorǵaýshysy Gaı Marselın Kılama óz qaqpasyna gol soǵyp aldy.
Oıynnyń 70-mınýtynda shymkenttik klýbtan Elhan Astanov tarazy basyn teńestirdi.
Osylaısha komandalar 1:1 esebine qanaǵat bildirdi. «Ordabasy» úshin chempıondyq ataqtyń taǵdyry sońǵy týrda sheshiledi.
Aıta ketsek, bul týrda búgin óz alańynda petropavldyq «Qyzyljar» Jezqazǵannyń «Ulytaýyn» 1:0, Kókshetaýdyń «Oqjetpesi» Aqtaýdyń «Kaspııin» 3:0 esebimen qapy qaldyrsa, «Jetisý» (Taldyqorǵan) - «Tobyl» (Qostanaı) 1:1 esebine qanaǵat bildirdi
Endi erteń, 25 qazanda 15:00-de «Altaı» (Óskemen) - «Elimaı» (Semeı), 16:00-de «Atyraý» - «Ertis» (Pavlodar), 18:00-de «Aqtóbe» - «Qaırat» (Almaty) sheberlik baıqasady.
Bul týrdy 19:00-de «Astana» - «Qaısar» (Qyzylorda) komandalary túıindeıdi.
