QPL: «Ordabasy» men «Elimaı» teń nátıjege qanaǵat bildirdi

ASTANA. KAZINFORM - Búgin fýtboldan Premer-lıga komandalary arasyndaǵy el birinshiliginiń HІІ týry máresine jetti.

Sońǵy eki oıynnyń birinde «Ordabasy» (Shymkent) men «Elimaı» (Semeı) komandalary kezdesti.

Qarsylastar týrnır kestesinde qatarlas keledi. Sondyqtan tartysty oıyn ótetini belgili edi. Jeńgen komanda jaǵdaıyn jaqsarta túsetini anyq bolatyn.

Oıyn barysynda «Elimaı» sapynan Kevın Rolon 39-mınýtta esep ashsa, 85-mınýtta Mýrodjon Halmatov tarazy basyn teńestirdi.

Komandalar 1:1 esebine qanaǵat bildirip tarasty.

Dál osyndaı eseppen «Qaısar» (Qyzylorda) men «Tobyl» (Qostanaı) kezdesýi aıaqtaldy. Bul oıynda alǵashqy bolyp esepti qostanaılyq klýbtan Marko Výkchevıch 18-mınýtta kózdegen nysanadan múlt ketken joq. Al 38-mınýtta «Qaısar» sapynan Dıdar Jalmuqan tarazy basyn teńestirdi.

Elordalyq «Astana» 15 maýsymda Kókshetaýdyń «Oqjetpesinen» 5:2 esebimen basym tústi.

Sondaı-aq 14 maýsymda «Jetisý» (Taldyqorǵan) men «Qaırat» (Almaty) 2:2,« Qyzyljar» (Petropavl) men «Aqtóbe» 0:0 esebine qanaǵat bildirse, «Atyraý» óz alańynda jezqazǵandyq «Ulytaýǵa» 0:1, túrkistandyq «Turan» elordalyq «Jeńiske» 0:2 esebimen ese jiberdi.