QPL: Marın Tomasov «Aqtóbe» qaqpasyna tórt gol soqty
NUR-SULTAN. QazAqparat - Búgin fýtboldan premer-lıga komandalary arasyndaǵy Qazaqstan chempıonatynyń 31-týry márege jetti, dep habarlaıdy QazAqparat tilshisi.
Jankúıerler búgin elordada ótken «Astana» men «Aqtóbe» komandalary arasyndaǵy kezdesýge kóz tikkeni belgili. Búginde «Astana» men «Qaırat» komandalary arasynda syrttaı chempıondyqqa tartys qyzyp turǵan jaıy bar. Elordalyq klýb búgin upaı joǵaltqan jaǵdaıda «Qaırattyń» altyn medal alýyna múmkindigi arta túser edi.
«Astana» týrnır kestesinde kósh sońynda kele jatqan komandany iri eseppen jeńdi. Bul kezdesýde elordalyq jartylaı qorǵaýshy Marın Tomasov 22, 44, 48, 56 mınýttarda tórt birdeı gol soǵyp, bıylǵy dop dodasyndaǵy alǵashqy pokerdi jasady. Nátıjesinde ol bıyl 19 goldyń avtory atanyp, surmergender kóshin bastady. Budan keıin Serikjan Mýjıkov 90-mınýtta qorytyndy esepti belgiledi. Osylaısha «Astana» qarsylasynan 5:0 esebimen basym tústi.
Qazir týrnır kestesinde «Qaırat» 31 oıynnan keıin 65 upaımen birinshi orynda tur. Olardan bir oıyny kem «Astananyń» 63 upaıy bar. Sondyqtan ázirge chempıondyqqa tartys odan ári jalǵasa túsedi.
Sondaı-aq, búgin Taldyqorǵanda jergilikti «Jetisý» men «Taraz» komandalary kezdesti. Kezdesýde 0:0 esebi tirkeldi.
Bul týrdaǵy qalǵan oıyndar 25 jáne 26 qazan kúnderi ótkizildi. Nátıjesinde óz alańynda «Qaısar» klýby «Atyraýdan» 0:1 esebimen jeńilse, «Qaırat» «Tobyldan», «Ordabasy» «Ertisten» 2:0 esebimen teń tústi. Al «Shahter» men «Oqjetpes» arasyndaǵy kezdesýde 2:2 esebi tirkeldi.
Al 30 qazanda 26 jáne 29-týrdaǵy keıinge qaldyrylǵan oıyndar ótkiziledi. Dál osy kúni 26-týrdaǵy «Oqjetpes» pen «Astana» kezdesse, 29-týrdaǵy «Qaısar» men «Tobyl», «Shahter» men «Atyraý» klýbtary sheberlik baıqasady.
