QPL: Kóshbasshy komandalardyń oıyny qalaı ótti
NUR-SULTAN. QazAqparat - Búgin elimizde fýtboldan Premer-lıga komandalary arasyndaǵy Qazaqstan birinshiliginiń 13-týr oıyndary máresine jetti, dep habarlaıdy QazAqparat tilshisi.
Budan buryn eki oıynnyń nátıjesi jaıynda habarlaǵan edik. «Atyraý» men «Oqjetpes» arasyndaǵy kezdesý 1:1 esebimen teń aıaqtaldy. Al «Ordabasy» óz alańynda «Oqjetpesti» 3:0 esebimen oısyrata jeńdi.
«Astana» men «Jetisý» arasyndaǵy kezdesý taǵdyryn bir gol sheshti. Ony 36-mınýtta «Astana» oıynshysy Evgenıı Postnıkov oryndady. Kezdesýde elordalyq klýb 1:0 esebimen jeńdi.
Al Almatyda «Qaırat» kósh sońynda kele jatqan «Aqtóbeni» qabyldady. Bul kezdesýde almatylyq shabýylshy Aderıonsloa Eseola 59 jáne 73-mınýtta eki gol soqty. Qorytyndy esepti 89-mınýtta «Qaırat» oıynshysy Marton Eppel belgiledi. Kezdesýde almatylyq klýb 3:0 esebimen basym tústi.
Sondaı-aq Qyzylordada jergilikti «Qaısar» Pavlodardyń «Ertisinen» 2:0 esebimen basym tústi. Oıynnyń 47-mınýtynda qyzylordalyq jartylaı qorǵaýshy Tıgran Barsegıan esep ashsa, 84-mınýtta Abdel Azız Lamanj esepti ústemeleı tústi.
Qostanaıda «Tobyl» Qaraǵandynyń «Shahterin» súrindirdi. Bul kezdesýde qostanaılyqtar sapynan 25-mınýtta Baýyrjan Turysbek, 59-mınýtta Azat Nurǵalıev gol soqty. Oıynda «Tobyl» 2:0 esebimen jeńiske jetti.
Ulttyq quramanyń oıyndaryna baılanysty el birinshiliginde eki aptadan astam úzilis bolady. Endi 14-týr oıyndary 16 maýsymda ótedi. Bul kúni «Aqtóbe» men «Tobyl», «Astana» men «Qaısar», «Jetisý» men «Ordabasy», «Oqjetpes» pen «Qaırat», «Taraz» ben «Ertis», «Shahter» men «Atyraý» komandalary kezdesedi.
